नेपाल खेलकुद पत्रकार मञ्चले आयोजना गर्दै आएको ‘पल्सर स्पोर्ट्स अवार्ड’ मा डिसहोमले निरन्तर साथ दिदै आएको छ। २०७३ साल साउन ६ गते प्रज्ञा प्रतिष्ठान, कमलादीमा हुने ‘पल्सर स्पोर्ट्स अवार्ड २०७२’ को लागि शुक्रबार मञ्च र डिसहोमवीच प्रायोजन सम्झौता नवीकरण गरेको छ।
प्रायोजन सम्झौता–पत्रमा नेपाल खेलकुद पत्रकार मञ्चका अध्यक्ष महेश आचार्य र डिस मिडिया नेटवर्क प्रालिका प्रमुख कार्यकारी अधिकृत सुदीप आचार्यले हस्ताक्षर गरे। लगातार छैटौं बर्ष भएको सम्झौताअनुसार डिसहोम ‘पल्सर स्पोर्ट्स अवार्ड २०७२’ को सह–प्रायोजक बनेको छ।
‘हामीले सँधै सहकार्य गर्नुपर्छ भन्ने उद्धेश्य लिएको कार्यक्रम हो यो (पल्सर स्पोर्ट्स अवार्ड)। निरन्तर सहकार्य गर्न पाउँदा अत्यन्त खुसी छौं,’ डिस मिडिया नेटवर्क प्रालिका सहायक महाप्रबन्धक कल्याण अधिकारीले भने, ‘अवार्डको अझै उचाई थपिएको चाहन्छौं। यसका लागि हामी निरन्तर सहकार्य गर्न कटिबद्ध छौं।’ डीटीएच सेवा प्रदायक नेपाली खेलकुदमा ठोस कार्य गर्ने तयारीमा रहेको उल्लेख गर्दै उनले भने, ‘हामी खेलकुदलाई समाचारभन्दा एक तह माथि लान चाहन्छौं। देशका कुना–कुनामा हुने प्रतियोगितालाई प्रत्यक्ष प्रशारण गर्न चाहन्छौं। यसका लागि स्पोर्ट्स च्यानल ल्याउँदैछौं।’
मञ्चका अध्यक्ष महेश आचार्यले भने, ‘डिसहोमले अवार्डलाई सफलतापूर्वक सञ्चालन गर्न निरन्तर सहयोग गर्दै आएको छ। साथ र सहयोगको लागि डिसहोमलाई धन्यवाद। अब अझ राम्रो सहकार्य गर्दै जानेछौं।’ १८ वटा सेटअप बक्ससहित सह–प्रयोजनको रकम चार लाख ५० हजार रुपैयाँ बराबर भएको उनले जानकारी दिए।
अवार्डमा आठ विधाका विजेतालाई सेटअप बक्स र एक बर्षसम्मको सेवा निःशुल्क दिने डिस मिडिया नेटवर्क प्रा.लि.का प्रमुख कार्यकारी अधिकृत सुदीप आचार्यले बताए। बर्षको लोकप्रिय खेलाडीको लागि हुने एसएमएस भोटिङमा सहभागि हुनेमध्ये ‘लक्की ड्र’मार्फत् ५ जनालाई पनि डिसहोमको सेटअप बक्स दिइनेछ।
२०७२ सालमा हात पारेको उपलब्धिको आधारमा हुने बर्षका उत्कृष्ट पुरुष खेलाडी, बर्षका उत्कृष्ट महिला खेलाडी, बर्षका उत्कृष्ट युवा खेलाडी, पारा एथलिट र बर्षका उत्कृष्ट प्रशिक्षक, एसएमएस भोटिङको आधारमा हुने लोकप्रिय खेलाडी, स्पेसल अवार्ड र लाइफटाइम एचिभमेन्ट गरी आठ विधामा अवार्ड दिइनेछ।
अवार्डको मुख्य प्रायोजक हंशराज हुलासचन्द एन्ड कम्पनी रहेको छ। उत्कृष्ट पुरुष, महिला र लोकप्रिय खेलाडीले पल्सर मोटरसाइकल पाउनेछन्। अन्य विधाका विजेताले ५०–५० हजार रुपैयाँ प्राप्त गर्नेछन्। लोकप्रिय खेलाडीको मनोनयन असार १७ गते शुक्रबार सार्वजनिक हुनेछ।
