अफगानिस्तानको काबुलमा मारिएका १३ जना नेपालीको विषयलाई लिएर क्यानाडामा रहेको नेपाली कुटनीतिक नियोगले त्यहाँको सरकारसँग कुराकानी सुरु गरेको छ। काबुलस्थित क्यानेडेली दूतावासमा सुरक्षाकर्मी रहेका नेपालीको तालिबानी विष्फोटमा परेर हत्यासँगै फैलिएको आक्रोशलाई लिएर नेपाली कुटनीतिज्ञले क्यानाडाको ओटावामा प्रश्न उठाएको समाचार त्यहाँको ‘नेशनल पोष्ट’ले प्रकाशित गरेको छ।
खतरापूर्ण क्षेत्रबाट उनीहरुलाई किन त्यति असुरक्षित मिनिबसबाट ओसारियो भनेर प्रश्न उठाइएको हो। क्यानाडाको कुटनीतिक निकाय यस कुराका निम्ति दोषी रहेको समाचारमा उल्लेखित छ।
उक्त विष्फोटमा १३ जना नेपाली र दुई भारतीय सुरक्षा गार्डको निधन भएको थियो। विष्फोट कतिसम्म शक्तिशाली थियो भने मिनिबसको झ्याल उछिट्टिएर बाहिर निस्केको छ भने बसको बाहिरी भागमा समेत रगतका दागहरु देखिएका छन्। घटनामा ६ जना नेपाली घाइते भएका छन्। यसको जिम्मेवारी तालिबानले लिइसकेको छ।
यसै सन्दर्भलाई लिएर क्यानाडास्थित नेपाली कुटनीतिज्ञले त्यहाँका समकक्षीसँग कुराकानी गरेको समाचारमा उल्लेखित छ।
‘हामीले यस घटनामा नेपालको सरोकार र चाँसो क्यानेडेली सरकार समक्ष राख्दै के कस्तो परिस्थिति र कुटनीतिक सुविधामा नेपाली गार्डहरु उनीहरुको कार्यस्थलदेखि आवासक्षेत्रसम्म ओसारिने गरेका थिए भन्ने जानकारी मागेका छौं,’ शुक्रबार एक विज्ञप्ति जारी गर्दै त्यहाँस्थित नेपाली दूतावासले भनेको छ, ‘अहिले पनि काबुलस्थित क्यानेडेली दूतावासमा काम गरिरहेका नेपालीहरुका बारेमा पनि जिज्ञासा राख्दै उनीहरुको उचित सुरक्षा प्रवन्धको अनुरोध गरेका छौं।’
यस विषयमा क्यानाडाका प्रधानमन्त्रीले ट्वीटरबाट समवेदना प्रकट गरिसकेका छन् भने विदेशमन्त्री स्टिफन डियनले विज्ञप्ति जारी गर्दै भनेका छन्, ‘यस घटनाका पीडितहरु वर्षौंदेखि हाम्रो दूतावास परिवारकै रुपमा काम गर्दै आइरहेका थिए। अफगानिस्तानस्थित दूतावासमा कार्यरत मानिसहरुको सुरक्षाका निम्ति उनीहरुले दिएको सेवालाई हामी सम्झिरहने छौं।’
ठीक यतिबेलै अफगानिस्तानमा रहेका पश्चिमाहरुको पर्याप्त सुरक्षा प्रवन्ध रहेता पनि उनीहरुकै सुरक्षामा खटिएका गार्डहरु किन असुरक्षित? भनेर नेपालमा विभिन्न क्षेत्रबाट प्रश्न उठिरहेको पनि समाचारमा उल्लेखित छ।
क्यानेडेली सरकारले उसको अफगानिस्तान मिशनबारे चलाएको फेसबुक पेजमा पनि यतिबेला काबुल घटनालाई लिएर धेरैले आक्रोश व्यक्त गरिरहेका छन्।
यस विषयमा ‘ग्लोबल अफेयर्स क्यानाडा’ले एक इमेलमार्फत् घटनाबाट दुःखी भएको जनाउँदै तर, विष्फोटमा मारिएकाहरु साबर इन्टरनेशनल नामको निजी ठेकेदार कम्पनीले उपलब्ध गराएको भाडाका सुरक्षा गार्ड रहेको प्रष्ट पारेको छ। आगामी दिनमा उक्त कम्पनीले आफ्नो सुरक्षा सेवा प्रोटोकलमा सुधार ल्याउने प्रकृया सुरु गरेको जानकारी पनि इमेलमा दिइएको छ। यस विषयमा उक्त ठेकेदार कम्पनीसँग सम्पर्क गर्न खोज्दा भने कुनै जवाफ नदिइएको समाचारमा उल्लेखित छ।
यस विषयमा क्यानेडेली सेनाका प्रवक्ता इसाबेल ब्रेस्सीले काबुलस्थित दूतावासमा क्यानेडेली सेनाकै पनि केही सैनिकले सुरक्षा प्रदान गर्दैआएको स्पष्ट पारेकी छिन्। उनीहरुले दूतावासमा प्रदान गर्दै आएको सुरक्षालाई निरन्तरता दिने उनले बताइन्।
यस्ता सैनिकको संख्या कति छ र उनीहरु के कसरी परिचालित भइरहेका छन् भन्ने बारेमा भने सुरक्षाको कारणले गर्दा क्यानेडेली सेनाले खुलाउने गरेको छैन।