श्रीमतीलाई जलाएर हत्या गरि फरार भएका एक जनालाई नेपाल प्रहरीको सिआइबीले १७ वर्षपछि पक्राउ गरेको छ। काठमाडौं कोटेश्वर घर भइ ललितपुरको इमाडोल बस्ने ४३ वर्षको नवराज श्रेष्ठलाई पक्राउ गरिएको सिआइबीका एसपी दिवेश लोहनीले जानकारी दिए।
श्रीमतीलाई जलाएर हत्या गरेको भन्दै उनलाई पुनरावेदन अदालत पाटनले सर्वस्वसहित जन्मकैदको सजाय सुनाइ सकेको छ। उनले २०५६ साल पुस १६ गते राती रक्सी सेवन गरेर श्रीमती रिनामाथि मट्टितेल खन्याएर घाइते बनाएका थिए । रिनाको पुस १८ गते उपचारको क्रममा शिक्षण अस्पताल महाराजगंजमा मृत्यु भएको थियो ।
इमाडोलमा बसेपछि उनले थर परिवर्तन गरेर नगरकोटी राखेका थिए। श्रीमतीलाई मारेर फार रहेका उनी २०६६ सालमा वैदेशिक रोजगारीका लागि मलेसिया गएका थिए। उनी नेपाल फर्केपछि अर्को विवाह गरेका थिए। उनलाई कैद भुक्तानका लागि डिल्लीबजार कारागारमा पठाएको एसपी लोहनीले बताए।