काठमाडौंकेन्द्रित संघीय गठबन्धनले थालेको आन्दोलनको तेस्रो चरणको कार्यक्रम रिले अनसन आज २१ औं दिनमा प्रवेश गरेको छ।
अनसनको नेतृत्व गठबन्धनकै एक प्रमुख घटक संघीय समाजवादी फोरम नेपालका सांसद एवम् प्रभावशाली युवा नेता डा. विरेन्द्र महतोले गरेका छन् । गठबन्धनले बिहान ७ बजेदेखि बेलुका ७ बजेसम्म रिले अनसन गर्दै आएको छ ।
अनसन स्थल काठमाण्डूको खुलामञ्चमा सञ्चारकर्मीहरुसँगको संक्षिप्त कुराकानीमा गठबन्धनका नेता तथा संघीय समाजवादी फोरम नेपालका सांसद डा. विरेन्द्र महतोले भने, “समस्याको समाधान नगरि यो मुलुक अगाढी बढन सक्दैन, जहिलेसम्म समस्याहरु हल हुँदैनन् त्यो दिनसम्म हामीहरु संघर्ष गरि रहन्छौं ।”
संयुक्त लोकतान्त्रिक मधेशी मोर्चासहितको संघीय गठबन्धनले सुरु गरेको रिले अनसनमा विभिन्न राजनीतिक दलका नेताहरु, मानवअधिकारवादी, बुद्धिजीबीलगायतले समर्थन जनाउँदै आएका छन् ।
विभिन्न चरण र प्रकृतिका आन्दोलनपछि पनि सरकारले आफ्ना मागहरुको सुनुवाई नगरेको भन्दै संघीय गठवन्धनले रिले अनसनको कार्यक्रम थालेको थियो । संविधानको मस्यौदा बनेदेखि नै असन्तुष्ट रहेको गठवन्धनमा सहभागी दलहरु र सरकारबीच पछिल्ला दिनमा वार्ता समेत हुन सकेको छैन ।
तराई लगायत विभिन्न क्षेत्रमा भएका आन्दोलनको सुनुवाई नभएको भन्दै जेठको पहिलो हप्तादेखि राजधानी केन्द्रित आन्दोलन थालेको संघीय गठवन्धनले यसअघि दुई चरणको आन्दोलन गरि सकेको छ ।
सिंहदरबार र प्रधानमन्त्री निवासमा घेराउ कार्यक्रमका साथै राजधानीकै विभिन्न स्थान र देशका केही प्रमुख सहरमा सभाहरु गरेको गठवन्धनले काठमाडौंकै खुल्लामञ्चमा रिले अनशन बस्ने तेस्रो चरणको आन्दोलन सुरु गरेको हो ।
