ललितपुरको टौखेलमा जग्गा प्लटिङ्ग गर्दा बनाइएको पर्खाल भत्किँदा २ जना स्कुले विद्यार्थीको मृत्यु भएको छ।
लगातारको वर्षाका कारण शुक्रबार बिहान पर्खाल भत्किँदा टौखेलस्थित पुष्पाञ्जली बोर्डिङ्ग स्कुलका ९ वर्षिय कृपा राई र १० वर्षिय अन्जना पुन मगरको मृत्यु भएको हो। करिब ९ फिट अग्लो पर्खाल पर्खाल भत्किँदा कक्षा कोठामा पढिरहेको अवस्थामा राई र मगरको मृत्यु भएको हो। प्लटिङ्गको पर्खालले ३ र ८ कक्षाको कोठा भत्काइदिएको थियो । दुई वटा कोठा भत्किंदा २६ जना विद्यार्थी घाइते भएका छन्।
घाइते अधिकांश ३ कक्षाका विद्यार्थी हुन् । घाइतेमध्ये २१ जनाको बी एण्ड बी तथा ३ जनाको पाटन अस्पतालमा उपचार भइरहेको छ। २ जना भने उपचारपछि घर फर्किएका छन्। पाटन अस्पतालमा उपचाररत चार जना विद्यार्थीको अवस्था गम्भीर रहेको छ । अजय शाही, अनुप महर्जन, रोजिना लामा र सुनिता परियारको आइसीयुमा राखेर उपचार भइरहेको उपचारमा संलग्न चिकित्सकले बताएका छन्।
अभिभावकहरुले प्लटिङ्गको पर्खालले कक्षा कोठा नै भत्किएर दुर्घटना हुनुमा विद्यालय र प्लटिङ्गवाला दुवै दोषी रहेको बताएका छन् । उनीहरुले प्लटिङ्गको पर्खाल कमजोर भएको बारेमा विद्यालयले आफूहरुलाई खबर नगरेको बताए । उनीहरुले विद्यार्थीको ज्यानै जाने गरी पर्खाल बनाउने प्लटिङ्ग संचालक र कमजोर पर्खालका बारेमा बेवास्ता गर्ने विद्यालय संचालकमाथि कारवाहीको माग गरेका छन्।
प्लटिङ्गका संचालक कर्मा लामा हुन् । लामाले गोदावरी नगरपालिका कार्यालयसँग स्वीकृति नै नलिइ जग्गा प्लटिङ्ग गरेको नगरपालिकाका प्रमुख कार्यकारी अधिकृत श्रीराम आचार्यले जानकारी दिए। घटनापछि लामा फरार छन् ।
हेर्नुहोस् केही तस्बिरहरू
.jpg)
.jpg)
.jpg)
.jpg)
