पर्यटक प्रहरी इकाई पर्यटन बोर्ड भृकुटीमण्डपद्वारा आयोजित पर्यटक प्रहरी, स्थानीय प्रहरी तथा पर्यटन क्षेत्रका सरोकारवाला निकायहरुबीच नेपाल पुलिस क्लव भृकुटीमण्डपमा एकदिने अन्तरक्रियात्मक अभिमुखिकरण कार्यक्रम शुक्रबार सम्पन्न भएको छ ।
कार्यक्रमका प्रमुख अतिथि संस्कृति, पर्यटन तथा नागरिक उड्डयन मन्त्रालयका सचिव प्रेमकुमार राईले पर्यटन क्षेत्रको विकासमा निजी क्षेत्रका सम्वन्धित निकायको महत्वपूर्ण भूमिका रहने बताए । साथै पर्यटक प्रहरी समेत पर्यटन बिकासको लागि क्रियाशील रहेकोले आवश्यक साधनस्रोत वृद्धि, सेवा सुविधा र क्षमता अभिमुखिकरणका लागि सुदृढीकरण गरिनुपर्ने बताए।
उक्त अवसरमा महानगरीय प्रहरी कार्यालय रानीपोखरीका प्रमुख प्रहरी अतिरिक्त महानिरीक्षक प्रतापसिंह थापाले पर्यटकको संरक्षण तथा सुरक्षा गर्ने जिम्मेवारी पाएको पर्यटक प्रहरीलाई आवश्यक तालिम तथा विभिन्न भाषाको प्रशिक्षण प्रदान गर्नुपर्ने बताए।
कार्यक्रममा पर्यटन विभागका महानिर्देशक सुदर्शनप्रसाद ढकालले पर्यटक प्रहरीको सँस्थागत रुपमा विकास गर्न नेपाल सरकारले आर्थिक सहयोगको वृद्धि गरी अधिकार क्षेत्र तोकिनुपर्ने बताए ।
अध्यागमन विभागका महानिर्देशक केदार न्यौपानेले पर्यटक प्रहरीले पर्यटकको सुरक्षा तगायतका सेवामा मुस्कान सहितको सेवा प्रदान गर्दै आएकाले पर्यटक प्रहरी कार्य क्षमतामा दखल भएको चर्चा गरे।
केन्द्रीय अनुसन्धान व्यूरोका प्रमुख प्रहरी नायव महानिरीक्षक नवराज सिलवालले पर्यटक प्रहरीको थप सुधार तथा आवश्यक साधानस्रोत अभिबृद्धि गर्न आवश्यक भएको उल्लेख गरे । नेपाल पर्यटन बोर्डका सदस्य कृष्ण अर्याल र ठमेल पर्यटन बिकास परिषदका अध्यक्ष रामशरण थपलियाले नेपालको पर्यटन बिकास गर्न पर्यटक प्रहरीलाई थप बलियो बनाएर लैजानुपर्ने विचार व्यक्त गरे।