गातीको जम्बुमा बाढीले कटान गरेको सडक । तस्वीरः किशोर/सेतोपाटी
चीनमा भीषण पानी परेको कारण सिन्धुपाल्चोकको भोटेकोशी नदिमा आएको बाढीले सडक बगाउँदा अबरुद्ध भएको जुरे सडक खुलेको छ। बिहानैदेखि ३ वटा जेसिभी लगाएर नयाँ ट्रयाक खोलिएको हो । साविकको खडकमा अहिले खोला बगिरहेको छ ।
जुरे पहिरोमा नयाँ ट्रयाक खोलेर सवारी साधन सूचारू गरे पनि झण्डै महिना दिनसम्मका लागि बाह्रविसे तातोपानी सडक नखुल्ने भएको छ। बाढीले गाती–३ जम्बुमा सडक कटान गरेकाले लामो समयसम्म सडक नखुल्ने देखिएको हो। जम्बुमा सडक कटान भएको स्थानमा कुनै पनि अर्को बैकल्पिक सडक बनाउन सकिने सम्भावना न्यून छ। यहाँ बाढीले सडकको पूरै भाग कटान गरेको छ ।
‘तल खोला छ, माथि पहरा भएकाले बैकल्पिक सडक निर्माण गर्न समस्या छ,’ सिन्धुपाल्चोक उद्योग बाणिज्य संघका बरिष्ठ उपाध्यक्ष निमफुञ्जो शेर्पाले भने,‘ नयाँ ट्रयाक खोल्नका लागि ठूलै कसरत गर्नुपर्ने हुन्छ ।’ बाढी आएपछि सडक हेर्न त्यहाँ पुगेका शेर्पाले बाह्रविसे–तातोपानी खण्ड सूचारु गर्न अर्को उपाय लगाउनुपर्ने बताए ।
बाढीले पुर्याएको क्षति निरीक्षण गर्न सदरमुकाम चौताराबाट प्रमुख जिल्ला अधिकारी गोकर्णमणी दुवाडी, जिल्ला प्रहरी प्रमुख एसपी रविन्द्र केसी, अनुसन्धान प्रमुख हरिचन्द्र श्रेष्ठ, गोरखबहादुर गणका सेना, नेपाल रेडक्रसका पदाधिकारीलगायत भोटेकोशी पुगेका थिए ।
जम्बुमा बाढीले कटान गरेको सडक हेर्दै प्रजिअ गोकर्णमणी दुवाडीले नयाँ सडकका लागि समस्या आएको बताए । ‘छेऊबाट अर्को वैकल्पिक सडक निर्माण गर्नसमेत गाह्रो हुने अवस्था रहेछ,’ उनले भने ।
चीनमा पहिरो आएर नदि थुनिएको थियो । सो नदि एकैचेटी खुलेकै कारण सिन्धुपाल्चोकमा पानी नपरेपनि ठूलो बाढी आएको हो । बाढीले लिपिङका २१ र बाह्रविसेका ३ घर बगाएको छ । तातोपानीमा रहेका मान सरोवर बोडिङ स्कुलको कुनै निसाना देखिदैंन । तातोपानी भन्सारको क्यान्टिन र त्यहाँ रहेका २ वटा ट्रिपर बगाएको सीमा प्रहरी चौकी लार्चाले जनाएको छ । त्यस्तै बाह्रविसेमा रहेको कुखुरा फर्म, मोटर ग्यारेज, बगाएको छ । इलाका प्रहरी कार्यालय बाह्रविसेका प्रहरी प्रमुख इन्सपेक्टर राजु पाण्डेले मोटर ग्यारेज बगाउँदा २ वटा सुमो जीपसमेत बगाएको बताए ।
