युरोकप २०१६ का सेमिफाइनल खेल अहिले केहीबेरबाट फ्रान्समा सुरू हुँदैछन्। नेपाली समय अनुसार बुधबार राति १२: ४५ बजे लियोन स्थित स्टेड डे लियाने स्टेडियममा पोर्चुगल र वेल्सबीच पहिलो सेमिफाइनलमा प्रतिस्पर्धा हुँदैछ।
सेमिफाइनलसम्म आइपुग्ने क्रममा नवप्रवेशी वेल्स समूह बीको विजेता बन्दै नकआउट चरणमा प्रवेश गरेको हो। यता पोर्चुगल समूह चरणमा तीनै खेल बराबरी गर्दै उत्कृष्ट तेस्रो भएर अन्तिम १६ मा प्रवेश गर्यो।
वेल्सले क्वाटरफाइनलमा बलियो मानिएको बेल्जियमलाई ३–१ को फराकिलो अन्तरले हरायो भने यता भाग्यको साथ पाएको पोर्चुगलले पेनाल्टीमा पोल्याण्डलाई ५–३ हराउँदै संघर्षपूर्ण जित निकाल्यो।
यसअघि प्रिक्वाटरफाइनलमा पोर्चुगलले क्रोएसियालाई अतिरिक्त समयमा हराएको थियो भने वेल्सले प्रिक्वाटरफाइनलमा उत्तरी आयरल्याण्डलाई हराउँदै युरो कपमा इतिहास रचेको थियो।
वेल्स पहिलो सहभागितौ सेमिफाइनल पुगेको युरो कपको पहिलो टोली हो। यता पोर्चुगल सातौं सहभागितामा पाँचौ पटक सेमिफाइनल खेल्दैछ।
यसअघि खेलेका चार मध्ये एक पटक मात्र पोर्चुगल फाइनलमा पुगेको थियो।
यता पहिलो सहभागितामै युरोकपको अन्तिम चारमा पुगेको वेल्सले आज पोर्चुगलविरुद्ध ऐतिहासिक उपलब्धि हात पार्न सके युरो इतिहासमै नयाँ इतिहास लेख्ने पक्का छ।
हेड टु हेड
पोर्चुगल र वेल्स मुख्य प्रतियोगितामा खेल्न लागेको यो पहिलो पटक हो। यसअघि भएका तीन खेलमा पोर्चुगलले दुई खेल जितेको छ भने वेल्स एक खेलमा विजयी भएको छ।
वेल्स सन् १९९२ पछि डेब्युमै सेमिफाइनल पुग्ने पहिलो टीम हो। यदि फाइनल पुगे सन् १९७२ मा जर्मनीपछि पहिलो टोली बन्नेछ।
अहिलेसम्म सोभियत रुस, स्पेन, इटली र जर्मनीले पहिलो सहभागितामै उपाधि जितेका छन्। पोर्चुगल र वेल्स जो फाइनल पुगे पनि अहिलेसम्म युरोकप नतिजेको टोली फाइनल पुग्नेछ र उपाधि नै जिते युरोकपले नयाँ विजेता पाउनेछ।
वेल्स र पोर्चुगलको विजेताले फाइनलमा जर्मनी र फ्रान्सको विजेतासँग उपाधिका लागि भिड्नेछ।
हेर्नलायक खेलाडी
प्रशिक्षक फर्नान्डो सान्तोष तथा अन्य खेलाडीले कप्तान क्रिस्टियानो रोनाल्डोलाई बढी विश्वास गरेका छन्। उनीहरू रोनाल्डोको उत्कृष्ट खेलको प्रतीक्षामा छन्। कप्तान रोनाल्डोलाई वेल्सविरुद्धको खेल विशेष हुनेछ। युरोकप इतिहासमा तीन सेमिफाइनल खेल्ने उनी एक मात्र फुटबलर हुनेछन् । रोनाल्डोलाई आफ्नो करिअरमा राष्ट्रलाई एक उपाधि दिलाउने अवसर छ।
पोर्चुगलले सेमिफाइनलमा मिडफिल्डर विलियम काराभाल्होलाई गुमाएको छ । लगातार दुई पहेँलो कार्ड पाएकाले उनले वेल्सविरुद्धको खेलगुमाएका हुन् ।
यता समूहदेखि सेमिफाइनलसम्मको यात्रा गर्दा वेल्सका सबै खेलाडीले एकै स्तरमा खेलेका छन्। वेल्सको कुरा गरिरहँदा रियल म्याड्रिडका स्टार गेराथ बेलको बढी नै चर्चा हुन्छ। वेल्सलाई नकआउट चरणमा पुर्याउन बेलले उत्कृष्ट प्रदर्शन गरेका थिए। विश्वकै सर्वाधिक महँगा खेलाडी बेलको साथ रहेको वेल्सले दुई खेलमा पहेँलो कार्ड पाएका आरोन राम्सेलाई सेमिफाइनलमा गुमाएको छ।
