धारिलो हतियार प्रयोग गरी गुल्मीको बाँझकटेरीमा अज्ञात समुहले एकजनाको हत्या गरेको छ।
बाँझकटेरी–१ छहराका ५५ वर्षीय छत्रबहादुर सेन वलीको गएराति अज्ञात समुहले हत्या गरेको जिल्ला प्रहरी कार्यालय गुल्मीले जनाएको छ।
राति १ बजेतिर दुईजनाको समुहमा आएका व्यक्तिले आफूहरुलाई समस्या परेको बताउँदै ढोका खोल्न लगाएर पैसा मागेको र पैसा छैन भनेपछि एक्कासी धारिलो हतियार प्रहार गरी हत्या गरेको जिल्ला प्रहरी प्रमुख एसपी भोला रावलले जानकारी दिए।
छोरी र श्रीमतीसंगै घरमा रहेका सेन वलीको हत्यापछि दुई थान मोबाइल र श्रीमतीले कानमा लगाएका सुनका गहना समेत लुटेर लगेको प्रहरीले जनाएको छ।
घटनास्थलमा इलाका प्रहरी कार्यालय पुर्कोटदहको प्रहरी टोली पुगेर घटनाको बारेमा अनुसन्धान सुरु गरेको छ। हत्याराहरुको खोजी भइरहेको प्रहरीले जनाएको छ।
