संघीय समाजवादी फोरम नेपालका सांसद डा. विरेन्द्र महतोले मधेशी मोर्चा अब बन्ने सरकारमा सहभागी भए जनतामा नाँगिने चेतावनी दिएका छन्।
शुक्रबार सञ्चारकर्मीहरुसँगको संक्षिप्त कुराकानीमा सांसद डा. महतोले भने,‘मधेशी मोर्चा नयाँ बन्ने सरकारमा सहभागी हुने हल्ला बाहिर आएको छ, यदि यो साँचो हो भने यो राजनीतिक बेईमानी हुनेछ, मधेशी जनतामाथि झूठको राजनीति गरेको सिद्ध हुन्छ।’
उनले अहिले मधेशी मोर्चासहितको संघीय गठबन्धन आन्दोलनकै चरणमा रहेको उल्लेख गर्दै मधेशी जनताको छातिमा गोली बर्साउने दलहरुको भर्याँग बनेर सत्तामा जान नहुने अडान दोहोर्याए। उनले थपे,‘हाम्रो लागि जुन पार्टीको नेतृत्वमा सरकार बनेपनि उही कुरा हो, हिजो काँग्रेसकै पालामा मधेशी जनता आन्दोलनमा धेरै मारिएका थिए, प्रमुख राजनीतिक दलहरुकै उदासिनता कारण हाम्रा मागहरु अहिलेसम्म सम्बोधन भएका छैनन, अनि हामी किन तीनीहरुको नेतृत्वमा सरकारमा जाने?’
सांसद महतोले मधेशी जनतालाई यतिवेला अधिकार चाहिएको उल्लेख गर्दै सत्ताको लोभमा हाम फालेर दलहरु अब बन्ने सरकारमा सहभागी भए त्यसले नराम्रो सन्देश जाने ठोकुवा गरे। उनले थपे,‘०७४ माघसम्म हामीले सरकारमा जाने कल्पनापनि गर्नुहुँदैन, हाम्रो मुख्य काम भनेको नै संविधान संशोधनमार्फत आफ्ना मुद्दाहरु स्थापित गर्नु हो, सोही अनुरुप काम गर्नुपर्छ।’
यद्धपी नयाँ निर्वाचनपछि जनताको मत लिएर मधेशी नेताहरु आफ्नै नेतृत्वमा सरकार बनाउनतर्फ लाग्नुपर्ने उनको सुझाव छ।
उनले मोर्चाले प्रधानमन्त्री ओलीविरुद्ध मतदान गर्ने र नयाँ सरकारको पक्षमा मत हाल्ने तयारी गरेको समेत जानकारी दिए। उनले नयाँ सरकारले मधेशको मुद्दाबारे कस्तो नीति तथा दृष्टिकोण अख्तियार गर्छ सोही अनुरुप सरकारमा जाने नजानेवारे पछि निर्णय गर्नुपर्ने धारणा समेत राखे।
उता पार्टी अध्यक्ष उपेन्द्र यादवले समेत माओवादीले प्रधानमन्त्री केपी शर्मा ओली सरकारलाई समर्थन फिर्ता लिएलगत्तै दिएको प्रतिक्रियामा भनेका थिए,‘यो हाम्रो लागि स्वा गतयोग्य छ, हामी ओली सरकारको पतनको पक्षमा थियौं, अब नयाँ सरकार बनाउन काँग्रेस–माओवादी गठबन्धनको नेतृत्वलाई सघाउँछौं।’
