नदीनाला तथा दहमा पानीको सतह बढेपछि त्यसकै कारणबाट झापामा मृत्यु हुनेको संख्या दुई पुगेको छ।
पश्चिम–दक्षिण झापाको गौरादहस्थित गेउरिया खोलाको बाढीले बगाएर आइतबार दिउँसो बेपत्ता भएका स्थानीय गौरादह–५ का अनुप न्यौपाने शव फेला परेपछि झापामा वर्षाका कारण मृत्यु हुनेको संख्या दुई पुगेको हो। यस अघि गोलधाप–९ का कालीबहादुर लिम्बूको घर नजिकैको दहमा डुबेर आइतबार मृत्यु भएको थियो।
प्रहरीका अनुसार नेपाल प्रहरीको उद्धार टोलीले सोमबार बिहान साढे १० बजे बेपत्ता न्यौपानेको शव फेला पारेको जिल्ला प्रहरी कार्यालय झापाले जनाएको छ। घटनास्थलबाट करिब २० मिटर दक्षिण दुरीमा न्यौपानेको शव रुखको जरामा अड्किएको अवस्थामा फेला परेको जिल्ला प्रहरी कार्यालय झापाका सूचना अधिकृत हरिप्रसाद शर्माले बताए। आइतबार दिउँसो गेउरिया खोला तर्ने क्रममा सोही खोलामा आएको बाढीले न्यौपानेलाई लाई बेपत्ता बनाएको थियो।
गेउरियामै बेपत्ता भएका टेकेन्द्र खड्काको अवस्था अझै अज्ञात रहेको प्रहरीले जनाएको छ।
यता कन्काई नदीले आइतबार बेपत्ता बनाएका अर्का डि मर्डीको अवस्था अज्ञात छ। स्थानीयबासी र प्रहरीले सोमबार बिहानैदेखि मर्डीको खोजी गरे पनि उनको अवस्था पत्ता लगााउन सकेको छैन। कन्काईमा पानीको सतह बढेको बढ्यै गरेकाले खोजी गर्न समस्या भएको स्थानीयबासीले बताएका छन्। नदीमा बाढी आएका बेला बगाएर ल्याएको दाउरा समात्न पसेका मर्डीलाई खोलाले बगाएको थियो।
