बन्द गराउँदै हिँडेका १२ जना नेत्रविक्रम चन्द विप्लव माओवादीका कार्यकर्तालाई दाङ प्रहरीले पक्राउ गरेको छ। यातायात र बजार बन्द गराउँदै हिडेका १२ जनालाई पक्राउ गरिएको जिल्ला प्रहरी प्रमुख एसपी धिरजप्रताप सिंहले जानकारी दिए।
उनका अनुसार तुलसीपुरबाट ६ जना र घोराहीबाट ६ जना कार्यकर्ता पक्राउ परेका छन्। नेकपा माओवादी दाङका जिल्ला सेक्रेटरी बलबहादुर ओलीले शान्तिपूर्ण आन्दोलनमा अनावश्यक बल प्रयोग गर्दै धरपकट गरेको भन्दै विरोध गरेका छन्।
सितलका अनुसार तुलसीपुरबाट प्रहरीले पार्टी जिल्ला कमिटी सदस्यहरू तिलक योगी, अमर केसी, तुलसीपुर नगर कमिटी सदस्यहरू सुदशर्न, निरज विक, अनेरास्ववियु क्रान्तिकारीका जिल्ला कमिटी सदस्य हेमन्तप्रकास वली, अखिल ट्रेड युनियन महासंघका जिल्ला सहसचिव मिलाप मेगीलाई पक्राउ गरिएको छ।
त्यस्तै, घोराहीबाट विद्यार्थी संगठनका नवराज विश्वकर्मा, विवश विसी, मनोज केसी, शिवराज महतरा, तेजेन्द्र रोका, र अनिल केसी रहेको जिल्ला सेक्रेटरी सितलले जानकारी दिए। नेपाल बन्दको प्रभाव दाङमा पनि बिहानैदेखि परेको छ। बन्दका कारण जिल्लामा मोटर गाडी, बजार, कलकारखाना, उद्योग, विद्यालय सबै ठप्प छन्।