काठमाडौं प्रहरी परिसरका सई निर्मल ज्ञवाली र प्रहरी जवान सन्तोष खड्काले घुस लिएको पुष्टि भएको छ। छानबिन समितिले उनीहरुको संलग्नता भएको पुष्टि गरेको छ ।
'सईको संलग्नता धेरै र जवानको केही मात्र देखियो', छानबिन समितिका एक प्रहरी अधिकारीले भने, 'छिट्टै प्रतिवेदन एआईजी प्रतापसिंह थापालाई बुझाउँछौं ।' घुस लिएको आरोपमा दुवै जना अहिले निलम्बनमा छन् ।
डिआईजी मिङमार लामाको नेतृत्वको छानबिन टोलीले ज्ञवाली र खड्काले घुस लिएको विषयमा थप अनुसन्धान गरिरहेको छ। छानबिन टोलीमा एसएसपी सुशिल भण्डारी, एसपी सहकुल थापा र डिएसपी रमेश थापा सदस्य छन् । वैदेशिक रोजगारीका लागि कुवेत गएकी सुनीता तामाङ राम्रो काम नपाएपछि नेपाल फर्किएको र पठाउने एजेन्टविरुद्ध उनले प्रहरीमा उजुरी दिएकी थिईन । त्यसपछि प्रहरीले एजेन्ट भूपाल गिरीलाई पक्राउ गरेको थियो ।
मानव बेचबिखन मुद्दा चल्ने प्रहरीको तयारीपछि हिरासतमा रहेका गिरीले मुद्दा मिलाउन भन्दै सुनीता राई, विनोद तामाङ र पशुपति राईलाइ २० लाख रुपैयाँ दिएका थिए । उनीहरुले पीडित तामाङलाई पाँच लाख रुपैयाँ मात्र दिएका थिए ।
सुनिता राईले पछि फेरि गिरीसँग ५० लाख माग्दै ब्ल्याकमेलिङ गरेकी थिईन । त्यसपछि गिरी आफैँले प्रहरीका उच्च कर्मचारीलाई सो विषयमा जानकारी गराएका थिए । सुनीता राई, विनोद तामाङ र पशुपति राई तामाङकी आफन्त हुन्।
त्यसपछि अनुसन्धान गर्दै जाँदा सइ ज्ञवाली र खड्काको मिलेमतोमा २० लाख रुपैंयाको कागजमा पीडितलाई हस्ताक्षर गरेको खुल्न आएको हो । २० लाखको कागज गराएवापत प्रहरी सई र जवानले एक एक लाख लिएको खुल्न आएको छ ।