गृह मन्त्रालयले बाढी पहिरो र डुबानमा परेकाहरुको उद्धार र राहतका लागी प्रधानमन्त्री दैवी प्रकोप उद्धार कोषसँग ७५ करोड रुपैयाँ माग गरेको छ।
गृहमन्त्री भीम रावलको अध्यक्षतामा बुधबार बिहान सिंहदरबारमा बसेको केन्द्रीय दैवी प्रकोप उद्धार समितिको बैठकले प्राकृतिक प्रकोपमा परेकाको राहत र उद्धारका लागि प्रधानमन्त्री दैवी प्रकोप उद्धार कोषसँग तत्कालका लागि ७५ करोड रुपैयाँ माग गर्ने निर्णय गरेको हो। समितिले बाढी पहिरो र डुबानमा परेकामध्ये कतिपय खुला आकाशमुनि भोकभोकै बस्न बाध्य भएको भन्दै राहत र उद्धारमा ढिलाइ गर्न नहुने निष्कर्षसहित तत्काल बजेट उपलब्ध गराउन माग गरेको हो।
प्रधानमन्त्री दैवी प्रकोप उद्धार कोषको सञ्चालन तथा व्यवस्थापन राष्ट्रिय योजना आयोगका उपाध्यक्ष संयोजक तथा विभिन्न ८ वटा मन्त्रालयका सचिव रहेको समितिले गर्छ। केन्द्रीय दैवी प्रकोप उद्धार समितिले बाढी पहिरो र डुबानमा परेकालाई सकेसम्म सार्वजनिक आश्रयस्थलमा तथा नभए पाल वितरण गरेर बस्ने व्यवस्था मिलाउन जिल्लास्थित दैवी प्रकोप उद्धार समितिहरुलाई निर्देशन दिएको छ। यस्तै, डुबानग्रस्त क्षेत्रहरुमा झाडापखाला लगायतका महामारी फैलन नदिनका लागि खानेपानी, औषधी र खाद्यान्नको व्यवस्था गर्न तथा त्यसका लागि आवश्यकता अनुसार हेलिकोप्टरको प्रयोग गर्न पनि बैठकले निर्देशन दिएको छ।
बैठकले बाढी आउने क्रम नरोकिएको भन्दै डुबान प्रभावितहरुको उद्धारका लागि राजमार्ग र सदरमुकामसँग जोडिएका सहायक मार्गहरु तयारी अवस्थामा राख्न पनि निर्देशन दिएको छ।