ओलम्पिक सुरु हुनुभन्दा एक साताअघि ब्राजिलको साओ पाउलोमा एक चर्चित महिलाको अपहरण भएको छ। फर्मूला वानका मालिक बार्नी इक्लेस्टनकी सासु ६७ वर्षीय आर्पेसिडा चुकं फ्लोसी पाल्मेराको शुक्रबार राति अपहरण भएको घटनाले ब्राजिल सरकार अफ्ठेरोमा परेको छ।
सुरक्षा निकायले अहिलेसम्म पाल्मेराको अपहरणको खबर सार्वजनिक गरेका छैनन्। तर, गृह मन्त्रालयका प्रवत्ताले अपहरणको घटनाको पुष्टी नगरे पनि त्यसलाई खारेज गरेका छैनन्। स्थानीय ग्लोबो टेलिभिजनका अनुसार अपहरणकारीले परिवारका सदस्यलाई टेलिफोन गरेको मोटो रकम माग गरेका छन्। ब्राजिलबाट प्रकाशित साप्ताहीक पत्रिका भेजाले अपहरणकारीको माग ३ करोड ६६ लाख अमेरिकी डलर रहेको बताएको छ।
पाल्मेरा इक्लेस्टनकी श्रीमति फाबियाना फ्लोसीकी आमा हुन्। ८५ वर्षीय अरबपति इक्लेस्टनले २००९ मा ३८ वर्षीय फ्लोसीसँग बिहे गरेका थिए। यिनीहरूको बिहे स्विट्जरल्यान्डमा भएको थियो। उनीहरू लन्डनमा बस्दै आइरहेका छन्।
९० को दशकमा ब्राजिलमा अपहरणको घटनालाई सामान्य मानिन्थ्यो। तर, अपहरणलाई रोक्न प्रहरीले छुट्टै विभागको गठन गरेपछि पछिल्लो केही वर्षयता यस्ता घटना नगन्य मात्रामा थियो। ब्राजिलमा प्रायः फुटबल खेलाडीको परिवारहरू अपहरणमा पर्ने गर्दछन्। सन् २००४ मा ब्राजिल राष्ट्रिय टोलीका स्टार रोबिन्होकी आमालाई अपहरणकारीले साओ पाउलोको बस्तिमा ४१ दिन बन्धक बनाएका थिए। आमालाई छुटाउन फिरौती बापत रोबिन्होले २ लाख अमेरिकी डलर खर्चिनु परेको थियो।
यस्तै, अर्का स्टार रोमारियोका पिता १९९४ मा अपहरणमा परेका थिए। उनलाई पनि ७ दिनपछि छुटाइएको थियो। भर्खरै मात्र राष्ट्रिय टोलीका स्टाइकर हल्ककी दिदी पाराइबा राज्यमा २४ घण्टा अपहरणमा परेकी थिइन्।