नयाँ बनेको संविधानले महिलाको हक अधिकारलाई सुनिश्चित गरेको सरोकारवालाले बताएका छन्।
सभ्य समाज महिला समूह टोखा– ११ को आयोजनामा आज यहाँ भएको उद्घोषण कलासम्बन्धी सात दिने तालिमको समापनमा नेपाली काँग्रेसकी सांसद कौशर शाहले संविधानले महिलाको हक अधिकारलाई सुनिश्चित गरेकाले मुलुकको उच्च पदमा महिला पुगेको बताइन्।
उनले महिला चुलो चौकाको काममा मात्र सीमित हुने गरेको वर्तमान समयमा यस्ता तालिमले महिलाको व्यक्तित्व विकासमा ठूलो सहयोग पुग्ने विश्वास व्यक्त गरिन्।
नेपाली काँग्रेस काठमाडौँका सभापति सवुज बानियाँले महिलालाई दिने विभिन्न तालिमले नेपाली समाजलाई क्रमशः रुपान्तरण गर्दै लगेको बताए। उनले नेपाली काँग्रेसले महिलाको नेतृत्व विकास सम्बन्धी कार्यक्रमलाई अन्य ठाउँमा पनि लैजाने उल्लेख गरे।
समूहका सल्लाहकार ओमकृष्ण विमली, समूहकी अध्यक्ष गुनु केसीले आधा आकास ढाक्ने महिलाको नेतृत्व विकास गर्न सकेमात्र मुलुकको विकास हुने भन्दै यस्ता कार्यक्रमलाई सरकारले प्राथमिकतामा राख्नुपर्ने धारणा राखे।
कार्यक्रममा टोखा नगरपालिका– ११ का विभिन्न आमा समूहबाट तालिम लिएका २५ महिलालाई प्रमाणपत्र वितरण गरिएको थियो। रासस
