प्रधानमन्त्री केपी शर्मा ओली र नेकपा (माओवादी केन्द्र) का अध्यक्ष पुष्पकमल दाहालबीच शनिबार भेटवार्ता भएको छ। प्रधानमन्त्रीसहित एमाले नेताहरूलाई भेट्न माओवादी अध्यक्ष दाहाल र उपाध्यक्ष नारायणकाजी श्रेष्ठ बालुवाटार पुगेका थिए।
भेटमा दाहालले आफ्नो नेतृत्वमा सरकार बन्न लागेको र राष्ट्रपतिले सहमतीय सरकार बनाउनका लागि आह्वान गरेकाले सहमतीय सरकारका लागि सहयोग गर्न प्रधानमन्त्री ओलीलाई आग्रह गरेका थिए। ‘हामीले तपाईँहरूको सहयात्री दल कांग्रेसले बहुमतीय सरकार बनाउने भनेको छ, अनि कसरी हामी सहभागी हुने? भनेर सोध्यौं’ भेटमा सहभागी एमाले नेता भीम रावलले सेतोपाटीसँग भने ‘उहाँहरूले त्यो त तैपनि कांग्रेसले तपाईँहरू पहल गर्नुस् भनेकाले आएका हौं भन्ने जवाफ दिनुभयो।’
रावलका अनुसार दाहालले आज कांग्रेस माओवादी र मधेसी मोर्चाबीच कार्यदल बनाउने विषयमा सहमति भएको कुरा पनि ओलीलाई जानकारी दिएका थिए। ‘जवाफमा हामीलाई नसोधी गर्नुभएको कुरामा हामीले के भन्ने तर हामी राष्ट्रिय मुद्धाहरुमा हामी समझदारी गरेर जान तयार छौं भन्यौ’ रावलले भने।
भेटमा प्रधानमन्त्री ओलीले चैतमा स्थानीय निकायको चुनाव हुने र त्यही बेला प्रधानमन्त्री पनि फेरिनु कुरा सम्भव नभएको बताएको पनि रावलले जानकारी दिए। करिब ४५ मिनेट भएको भेटवार्तामा एमालेबाट रावलसहित संसदीय दलका उपनेता सुवास नेम्वाङ पनि सहभागी थिए।