स्थानीय तहको संख्या र सिमाना निर्धारण आयोगले आफूले प्रस्तावित गरेको भन्दा बढी संख्यामा स्थानीय तह बनाउन आधार चाहिने बताएको छ।
आयोगले आफूले भौगोलिक क्षेत्र अनुसारको जनसंख्याको वितरण, क्षेत्रफल, जिल्लाको प्रकृति लगायतका पाँच वटा मापदण्डलाई आधार मानेर बढीमा ५ सय ६५ वटा स्थानीय तहको प्रस्ताव गरेको भन्दै यो भन्दा बढी स्थानीय तह बनाउनका लागि दलहरूले आधार तोक्नुपर्ने बताएको हो।
आफूले प्रस्तावित गरेको संख्यालाई लिएर राजनीतिक दलहरूबाट बिरोध आउने क्रम बढेपछि आयोगका पदाधिकारी सोमबार अपराह्न प्रधानमन्त्री पुष्पकमल दाहाललाई भेट्न बालुवाटार पुगेका थिए। तर, प्रधानमन्त्री दाहालको व्यस्तताका कारण आयोगका पदाधिकारी दाहाललाई नभेटी फर्किए।
आयोगका सदस्य सनिलरञ्जन सिंहले आयोगले हचुवाका आधारमा नभई मापदण्डका आधारमा संख्या प्रस्ताव गरेको भन्दै यस विषयमा प्रधानमन्त्री दाहाल र अन्य राजनीतिकर्मीलाई बुझाउन आवश्यक रहेको बताए।
प्रधानमन्त्री दाहालको सचिवालयले आयोगको प्रगति विवरण बारेमा जानकारी लिनका लागि आयोगका पदाधिकारी र माओवादी केन्द्रको बैठक साउन २६ गतेका लागि तय गरेको छ।