नाइजेरियाको फुटबल टोली हवाइजहाजको टिकटको पैसा बेलैमा तिर्न नसक्दा ढिलो गरेर ब्राजिल पुगेको थियो। पैसाको पुरै हिसाब चुक्ता नहुँदा हवाइ कम्पनीले नाइजेरियाका खेलाडीलाई अमेरिकामै एक दिन रोकेर राखेको थियो।
पैसाको अभावका कारण ओलम्पिक खेल्न जाने क्रममा दुःख पाएका नाइजेरियाको फुटबल टोलीका सदस्य अहिले दंग छन्। उनीहरूलाई जापानका एक प्लाष्टिक सर्जनले ३ लाख ९० हजार अमेरिकी डलर प्रदान गरेका छन्। जापानका कात्सुया ताकासुले रियो ओलम्पिकमा कास्य जितेको नाइजेरियाली टोलीका सदस्यलाई यति मोटो रकमले पुरस्कृत गरेका हुन्। नाइजेरियाले गत शनिवार कास्यका लागि भएको खेलमा होन्डुरसलाई ३–२ गोलअन्तरले पराजित गरेको थियो।
नाइजेरियाको खेलबाट प्रभावित जापानी चिकित्सक तत्कालै प्लेन चढेर रियो पुगेका थिए। उनले रियोमा नाइजेरियाको टिमलाई भेटेर चेक उपलब्ध गराएका थिए।
प्लेनको टिकटको पैसा समयमै चुक्ता गर्न नसक्दा नाइजेरियाका खेलाडी जापानविरूद्धको पहिलो खेल सुरु हुनुभन्दा ७ घण्टाअघि मात्र रियो उत्रिँएका थिए। प्रतिकुल परिस्थितिमा पनि उनीहरूले जापानलाई पराजित मात्र गरेनन्, समूह विजेताको रूपमा दोस्रो चरणमा प्रवेश गरे। खेल भइरहेकै अवस्थामा भत्ता नपाएपछि नाइजेरियाका खेलाडीले पुनः बीचैमा खेल छोड्ने धम्की दिएका थिए। यी सबै कुरा थाहा पाएका जापानी चिकित्सकले प्रतिकुल अवस्थामा पनि टिमले कास्य पदक जितेको भन्दै खेलाडीलाई पुरस्कृत गरेका हुन्।
