पूर्व मुख्यसचिव एवं बागमती सरसफाइ अभियानका अभियन्ता लीलामणि पौडैलले तुलसीपुरका हरेक पसलहरुमा छिरेर आफनो घर अगाडिको फोहोर आफैं व्यवस्थापन गर्न आग्रह गरेका छन्।
क्लिन तुलसीपुर, ग्रीन तुलसीपुर अभियान उद्घाटनका लागि दाङको तुलसीपुर आएका उनले मंगलबार बिहान अभियान उद्घाटनपछि फोहोर संकलन गर्दै जाँदा प्रत्येक पसलहरूमा छिरेर पसल सञ्चालकहरूलाई आफ्नो पसल वा घर अगाडिको फोहोर व्यवस्थापन आफैं गर्न आग्रह गरेका हुन्।
उनले पसल सञ्चालक र घरधनीहरूलाई भनेका थिए, ‘तपाईंको घर अगाडिको फोहोर सफा गर्न कोही आउँदैन, त्यो तपाईंले नै गर्ने हो।’ उनले हरेक पसल सञ्चालक र घरधनीहरूलाई अभियानमा अनिवार्य रुपमा एक जना पठाउन आग्रह समेत गरेका थिए। सरसफाइका अभियन्ता पौडलेले त्यतिमात्रै भनेनन्, उनले घरअगाडिको फोहर व्यवस्थापन नगर्ने र मनपरी गर्नेलाई १५ हजार जरिवाना र एक महिना जेल हाल्न सँगै रहेका प्रमुख जिल्ला अधिकारी दीपक काफ्ले र तुलसीपुर नगरपालिकाका कार्यकारी अधिकृत टोपेन्द्र कार्कीलाई अनुरोध गरेका थिए ।
उनले बजार क्षेत्रमा सडकखण्ड छोपेर गरिएका व्यापार तत्काल हटाउन आग्रह गर्दैै त्यस्तालाई कारबाही गर्न पनि सरोकारवालाहरूलाई सुझाव दिएका थिए। पुरानो वीरेन्द्र चोकको मुख्य सडकमै ठूलो भ्वाङ देखिपछि उनले त्यसलाई तत्काल छोपेर राख्न वा मर्मत गर्न आग्रह पनि गरेका थिए। मंगलबारदेखि सुरू भएको क्लिन तुलसीपुर, ग्रीन तुलसीपुर अभियानको पौडेलले नगरवासीलाई सामूहिक रुपमा सफल खुवाएर अभियानको सुरुवात गरेका हुन्।
अभियानमा सयौं नगरबासी सहभागी थिए। दाङका प्रमुख जिल्ला अधिकारी दीपक काफ्ले, पूर्व सांसद शान्ता चौधरी, तुलसलीपुर नगरपालिकाका कार्यकारी अधिकृत टोपेन्द्र केसी, तुलसीपुर खानेपानी उपभोक्ता तथा सरसफाइ संस्थाका अध्यक्ष खेम ओली, इलाका प्रहरी कार्यालय तुलसीपुरका प्रमुख डिएसपी कृष्ण प्रसाईं, नेपाली सेना, सशस्त्र प्रहरी, नेपाल प्रहरी लगायत तुलसीपुर क्षेत्रका दर्जनौं संघसंस्था र टोलविकास सस्थाहरूको अभियानमा सहभागिता थियो।
