नेकपा एमालेका अध्यक्ष केपी शर्मा ओलीले प्रतिपक्षमा भएपनि एमालेले मुलुक र जनताको हितमा गर्ने राम्रा काममा सरकारलाई सहयोग गर्ने बताएका छन्।
एमाले अध्यक्ष ओलीले बुधबार विहान सिंहदरबारमा बसेको संसदीय दलको बैठकमा एमाले सधैं मुलुक र जनताको हित चाहने पार्टी भएको भन्दै सरकारले चाल्ने राम्रा कदमप्रति सहयोग गर्ने बताए। उनले प्रतिपक्षी दल भएपनि एमालेले विरोधका लागि विरोध नगर्ने बताए।
सरकारलाई सहयोग गर्ने नाममा अन्धोरुपमा समर्थन नगर्ने बताउँदै उनले सरकारले मुलुकको अहित हुने काम गर्न खोजे एमालेले व्यवधान खडा गर्ने बताए।
एमाले अध्यक्ष ओलीले मुलुकको विकासका लागि सक्रिय भएर काम गर्न सांसद्लाई निर्देशन दिदैँ उनीहरुले डेडिकेशन फर द नेशनको भावना अनुसार काम गर्नुपर्ने बताए।
उनले प्रतिपक्षी दलका सांसद्ले शान्त भएर बस्न नहुने बरु गतिशील र सक्रिय हुनुपर्ने बताए।
एमाले अध्यक्ष ओलीले पार्टीले लिएका नीतिको पक्षमा तर्कपूर्ण रुपमा प्रस्तुत हुन पनि सांसद्लाई निर्देशन पनि दिए।