नेपाल प्रहरी केन्द्रीय अनुसन्धान ब्युरोको नक्कली डाक्टर समात्ने ‘अपरेशन क्वाक’को निशाना लागेपछि नोबेल मेडिकल कलेज विराटनगरका सञ्चालक प्रबन्ध निर्देशक सुनील शर्मा फरार भएका छन्। ब्युरोले गत असार ३ र ४ गते देशैभरिबाट ३६ डाक्टर समात्दा विराटनगरबाट ‘छलिएका’ शर्मा जापानतिर लागेका छन्।
भारत भागेको हल्ला चले पनि नोबेल अस्पतालले भने शर्मा जापानमै रहेको पुष्टि गरेको छ। नोबेल अस्पतालका प्रबन्धक नारायण दाहालका अनुसार शर्मा ‘आमाको उपचार’ गर्न जापानमा गएका हुन्।
‘सर लामो समयदेखि आमाको उपचारमा जापान जानुभएको छ, आइपुग्नुभएको छैन,’ दाहालले सेतोपाटीसँग भने, ‘सम्पर्क हुन नसकेकाले कहिले आइपुग्नुहुन्छ भन्ने थाहा छैन।’ तर, शर्माका निकटस्थले भने शर्मा जापानबाट भर्खरै दुबई सरेको दाबी गर्ने गरेका छन्। सात दिनयता शर्मा दुबई आएको एक निकटस्थले दाबी गरे।
ब्युरो स्रोतका अनुसार आइएस्सी सर्टिफिकेट नक्कली रहेको आशंकामा ‘अपरेशन क्वाक’मा शर्माको नाम चढेको थियो, शर्माको आइएस्सी सर्टिफिकेट बिहार बोर्डको हो। उनीजस्तै बिहार बोर्डबाट आइएस्सी सर्टिफिकेट ल्याएका डाक्टरलाई ब्युरोले समातेर मुद्दा चलाएको थियो।
शर्माका पुराना निकटस्थ, नोबेल अस्पताल, चिकित्सक संघ तथा ब्युरोबाट लिइएको जानकारी अनुसार शर्मा ‘अप्रेसन क्वाक’बाट छलिन विभिन्न शक्तिकेन्द्र धाए। कतैबाट उपाय नलागेपछि उनी विदेश रहेका हुन्। ‘हावा नचली पात हल्लिँदैन भनेझैं हामीले खोज्न थालेपछि उनी फरार छन्,’ ब्युरोका एक अधिकारीले भने।
स्रोतका अनुसार ‘अपरेसन क्वाक’ले पछ्याउन थालेपछि सुरूमा शर्मा कांग्रेस महामन्त्री डा. शशांक कोइरालाकहाँ पुगेका थिए। उनीबारे सबै बुझेपछि कोइरालाले छाडिदिएका थिए। शर्मा त्यसपछि आफ्ना पुराना सहयोगी माओवादी केन्द्रका नेता वर्षमान पुनकहाँ पुगे। तर, पुनबाट पनि पार नलाग्ने संकेत भेटिएपछि उनी परिवारसाथ विदेश लागेको स्रोतले जनाएको छ। शर्मा पछिल्लो समय प्रधानमन्त्री पुष्पकमल दाहालको पछि लागेको दाबी गरिएको छ।
शर्मा तीन महिनादेखि फरार भएपछि नोबेल अस्पतालमा कार्यरत डाक्टर समस्यामा परेका छन्। सञ्चालक लामो समयदेखि नहुँदा उनीहरूले तलब पाउन नसकेको जानकारी नेपाल चिकित्सक संघले पनि पाएको छ। ‘सञ्चालक भागेपछि डाक्टरले आफ्नो पारिश्रमिक पाउन नसकेको गुनासो आइरहेको छ,’ संघका एक सदस्यले सेतोपाटीसँग भने।
उनका निकटस्थका अनुसार शर्मा माध्यमिक तह पढ्न कालिकोट गएका हुन्। बेलबारी नगरपालिका घर भएका शर्मा त्यसअघि लेटाङ माध्यमिक विद्यालय पढ्थे। लेटाङमा एसएलसी फेल भएपछि उनी माध्यमिक तह पढ्न कालिकोट गए। मामा कालिकोट बस्ने भएकाले शर्मा उतै गए, कालिकोटको पञ्चदेव उच्च माविमा ९ कक्षाबाट भर्ना भए। लेटाङ रहँदा राजेन्द्र न्यौपाने नाम लेख्ने गरेका उनी कालिकोटबाट एसएलसी पास गरेर आउँदा सुनील शर्मा भइसकेका थिए।
सन् १९९६ मा शर्माले बिहार बोर्डबाट आइएस्सी सर्टिफिकेट ल्याएको बुझिन्छ। त्यसपछि उनी भरतपुर क्यान्सर अस्पतालको ल्याबमा काम गर्न पुगेका थिए। भरतपुर क्यान्सर अस्पतालका तत्कालीन मेडिकल सुपरीटेन्डेन्ट डा. सम्पूर्ण ढुंगानालाई माओवादीले ‘निशाना बनाउँदा’ शर्माले बचाइदिएको उनका एक निकटस्थले बताए।
त्यसको गुन तिर्न ढुंगानाले शर्मालाई एमबिबिएस पढ्न भनेर चार हजार डलर दिई चीन पठाएका थिए। सन् २००० मा शर्मा तिनको साङचाउ मेडिकल कलेज पुगेका थिए। तर, त्यहाँ शर्माले पढेनन्, हेनान प्रदेशको राजधानी सिन्स्याङ मेडिकल कलेज ट्रान्सफर भई पुगेका थिए। त्यहाँ उनले एमबिबिएस पढेनन्, बरू प्रोग्राम डाइरेक्टर भए र नेपालबाट विद्यार्थी र प्रोफेसर ओसार्ने गिरोह भएर नेपाल आए।
१० प्रतिशत कमिशन पाउने लालचमा उनले नेपालबाट करिब पाँच वर्ष विद्यार्थी चीन लगेका ती निकटस्थ बताउँछन्। उपकुलपति शेखर कोइराला हुँदा धरानस्थित बिपी कोइराला स्वास्थ्य विज्ञान प्रतिष्ठानबाट शर्माले झन्डै चार सय विद्यार्थी र प्रोफेसर चीन पुर्याएका थिए।
सन् २००५ मै उनको एमबिबिएस पढाइ सकिनुपर्नेमा त्यो भएन किनभने उनलाई कलेजले विद्यार्थीको रूपमा हैन, प्रोग्राम डाइरेक्टरको हैसियतमा स्वीकारेको थियो। तर, सन् २००७ मा चीन गएर शर्माले एमबिबिएसको सर्टिफिकेट ल्याएका थिए। ‘उनले आइएस्सी, एमबिबिएस दुबै पढेका हैनन्,’ ती निटकस्थ भन्छन्।
शर्माको इन्टर्न भने चितवनस्थित स्कुल अफ मेडिकल साइन्सेसको हो। त्यसका डाइरेक्टर नटराज शर्माले सुनीललाई इन्टर्नमा सघाएका थिए। पछि, मेडिकल काउन्सिलमा सुबोध अधिकारी र शशी शर्मा हुँदा सुनीलले चिकित्सा विज्ञानको अनुमति पाएका थिए।
सुनील रहेको नोबेल मेडिकल कलेज सुरूमा डा. ज्ञानेन्द्र गिरी, नवराज पाण्डे, आदित्य खनाल, उमेश पाण्डेलगायतको संयुक्त लगानीमा खुलेको थियो। तर, मेडिकल कलेजको सम्बन्धनका लागि उनीहरूले शर्मालाई पक्डेका थिए।
२०६४ सालमा बिना सेयर लगानीकर्ता बन्ने सर्तमा मेडिकल कलेजको अनुमतिका लागि शर्माले ती सञ्चालकलाई डा. शेखर कोइराला हुँदै तत्कालीन प्रधानमन्त्री गिरिजाप्रसाद कोइरालालाई भेटाएका थिए। सम्बन्धन पाएपछि माओवादी नेता वर्षमान पुनमार्फत काठमाडौं बोलाई गिरीसहित नवराज पाण्डे, आदित्य खनाल, उमेश पाण्डे लगायतलाई काभ्रे कामीडाँडा अपहरण गरिएको थियो। त्यसपछि शर्मा नोबेलका एकल सञ्चालक रहे, त्यसयता शर्मा वर्षमानका ‘प्रिय’ छन्।
पछिल्लो समय राज्यका निकायको नजरमा पर्न थालेपछि शर्मा राजनीतिक पार्टीमै आवद्ध भएर हिँडेका छन्। नेपाली कांग्रेसको तेह्रौं राष्ट्रिय महाधिवेशनमा उनी महाधिवेशन प्रतिनिधि भएका थिए। कांग्रेसको सदस्य समेत नरहेका उनले मोरङको क्षेत्र नम्बर ८ बाट यसै वर्ष क्रियाशील सदस्यता पाए, महाधिवेशन प्रतिनिधि चुनिए।
