भनिन्छ, खोजी गरियो भने, भगवान पनि भेटिन्छन्। तर, भारतमा क्रिकेटको ‘भगवान’ मानिने सचिन तेन्दुलकरले आफ्नो सबैभन्दा ठुलो लक्ष्यका लागि कति बर्ष तपस्या गर्नु पर्यो? यसको खुलासा भर्खरै भएको छ।
सचिनले आफ्नो एउटा कीर्तिमानका लागि करिब ५ वर्ष कुर्नु परेको थियो। उनले अन्तर्राष्ट्रिय क्रिकेटमा पहिलो सतक बनाउन ७८ एकदिवसीय खेलेका थिए। सचिनले एकदिवसीय खेलमा डेब्यु सन् १९८९ मा पाकिस्तानविरूद्ध गरेका थिए। तर, उनले पहिलो सतक भने सन् १९९४ मा पुरा गरे।
सचिनले २२ वर्षअघि आजकै दिन अस्ट्रेलियाविरूद्ध कोलम्बोमा सतक बनाएका थिए। पहिलो सतक बनाउनुअघि सचिनले थुप्रै अर्धसतक बनाएका थिए। तर, त्यसलाई सतकमा परिवर्तन गर्न असफल थिए। उनले सन् १९९२ मा न्युजिल्यान्डविरूद्ध बनाएको ८४ रन सतक बनाउनुअघि उच्च थियो।
सचिनले १ सय ३० बल खेल्ने क्रममा १ सय १० रन बनाएका थिए। उनले त्यतिबेला १ सय ८६ मिनेट क्रिजमा टिक्ने क्रममा ८ चौका र २ छक्का प्रहार गरेका थिए। सचिनलाई क्रेग म्याकडरमटले बोल्ड गरेका थिए।