जिल्लाको पश्चिमी गाउँ दुवाचौरको एक खोलामा आएको बाढीले बगाउँदा एकको मृत्यु भएको छ । घर बनाउन सरकारले दिएको पहिलो किस्ताको रकम लिएर सोमबार घर जाँदै गर्दा बाँसखर्क–५ का कोन्दो साङ्बो स्याङ्बोको खोलाले बगाएर मृत्यु भएको हो ।
अविरल बर्षाका कारण एक्कासी बाढी आएपछि ५० हजार रुपैयाँ अनुदान बोकेका उनलाई खोलाले बगाएको प्रहरीले जनाएको छ । स्याङ्बो अरु छिमेकीसँगै घर फर्कदै थिए । अनुदान लिन मेलम्ची झरेका उनी पैसा लिएर फर्कदै गर्दा खोलामा आएके बाढीले उनलाई बगाएको दाजु लाक्पाले बताए । लाक्पा र मृतक कोन्दो सँगै घर फर्कदै गरेका थिए ।
जिल्ला प्रहरी प्रमुख एसपी रविन्द्र केसीकाअनुसार पैसा सहित उनलाई बगाएको थियो । पछि शव भेट्दा पैसा उनको साथमा रहेको पाइएको उनले जानकारी दिए । प्रहरी टोली घटनास्थल पुगेर शवको पोष्टमार्टम भएको केसीले बताए ।
अनुदान लिन विकट गाउँबकाट सहरी क्षेत्रमा आउनुपर्ने बाध्यताका कारण आफूले बाबु गुमाएको छोरा अनिलले बताउँछन् । ‘जताततै पहिरो आइरहेको छ, खोला पनि एक्कासी बढ्ने गर्छ,’ उनले भने, ‘अनुदान दिने व्यवस्थ गाउँमै नमिदाउँदा यो समस्या आएको हो ।’