जंगली हात्तीको आक्रमणबाट बिहीबार दुईजनाको मृत्यु भएको छ। विद्यालयबाट घर फर्किने क्रममा बर्दिया ढोढरी गाविस बडा नं १ पत्थरबोझि बस्ने १५ वर्षीय युवराज थारुको बर्दिया राष्ट्रिय निकुञ्जको मध्यवर्ति क्षेत्रमा पर्ने सुर्यपटुवा गाविस ४ को डल्लागाउँमा जंगली हात्तीको आक्रमणबाट मृत्यु भएको निकुञ्ज प्रमुख रमेश कुमार थापाले बताए।
त्यस्तै बिहीबार राती नै ८ बजे सुर्यपटुवा गाविस ४ का ७२ वर्षीय पुरई थारुको पनि हात्तीको आक्रमणबाट मृत्यु भएको छ। आफ्नो खेतीबाली सुरक्षाका लागि खेतको मचानमा बसेका थारुको सुर्यपटुवा ३ डाँडागाउँमा मृत्यु भएको थापाले जानकारी दिए।
हात्तीको बथान गाउँ पस्नसक्ने हुनाले नियन्त्रण गर्न नेपाली सेनाको र चितवनबाट आएको प्राविधिकसहित खटिएको टोली त्यस क्षेत्रमा परिचालन गरिएको थापाले बताए।
जंगली हात्तीको गतिविधि बढिरहेकाले हुदा अर्को व्यवस्था नभएसम्म यस क्षेत्रमा पैदल र साईकलमा आवतजावत गर्न रोक लगाईएको छ।
विद्यार्थीको आवतजावतका लागि निकुञ्जले सवारी साधनको व्यवस्था गरेको समेत थापाले बताए।
