१५ दिन अगाडि काठमाडौंको बनस्थलीमा रहेको एक आइएमइमा ३ जना युवा प्रवेश गरे। पेस्तोल देखाएर डकैती गर्न थाले। आइएमइ काउन्टरमा उनीहरुले एक रुपैयाँ पनि फेला पारेनन्। त्यसपछि एक हप्ताभित्र २ लाख दिन उनीहरुले आइएमइ संचालकलाई दबाब दिए। प्रहरी कहाँ गएर जानकारी गराए ज्यान मार्ने धम्की उनीहरुले दिए।
आइएमइ संचालकले २ लाख रुपैयाँ नदिएपछि उनीहरुले चिठ्ठी लेखे। भदौ ३० गते विहान १० बजेसम्मका ५ लाख रुपैयाँ नदिए, छोरीलाई अपरहण गरेर बलात्कार गर्ने धम्की दिए। त्यसपछि आइएमइ संचालक महानगरीय अपराध महाशाखाको शरणमा पुगे।
चिठ्ठी पढ्ने वित्तिकै महाशाखा प्रहरी गम्भीर भएर अनुसन्धानमा खटे। हिजो विहीबार महाशाखाले ३ जनालाई पक्राउ गर्यो । सून्धाराको एक गेष्टहाउसबाट २ जना र एक जनालाई कोटेश्वरबाट पक्राउ गरिएको महाशाखाका एसपी सहकुल थापाले जानकारी दिए।
प्रहरीले गोर्खाका विशाजी गुरुङ, क्यानडाका पिआर पाएका रविन गुरुङ र रामेछापका माइकल भन्ने विष्णु मगरलाई पक्राउ गरेको एसपी थापाले बताए। प्रहरीले उनीहरुको साथबाट नक्कली पेस्तोल, मास्क, डोरी बरामद गरेको छ। यस विषयमा थप अनुसन्धान भइरहेको प्रहरीले बतायो।
