नेकपा एमालेले प्रधानमन्त्री पुष्पकमल दाहालको भारत भ्रमणका बेला जारी गरिएको संयुक्त वक्तव्यका कतिपय प्रावधानले नेपालको विदेश नीति र परम्परामा आँच पुर्याएको निष्कर्ष निकालेको छ।
केन्द्रीय कमिटी बैठकको एजेन्डा तय गर्न आज बसेको बैठकले यस्तो निष्कर्ष निकालेको एमाले सचिव एवम् प्रचार विभाग प्रमुख योगेश भट्टराईले जानकारी दिएका छन्।
नेपालले छिमेकी लगायत अन्य मुलुकसँग संयुक्त राष्ट्र सङ्घको बडापत्र, पञ्चशीलका सिद्धान्त र असंलग्न परराष्ट्र नीतिका आधारमा सम्बन्ध विकसित गर्दै आएको बैठकपछि सचिव भट्टराईले जारी गरेको विज्ञप्तिमा उल्लेख छ।
'तर, वर्तमान सरकारले कुटनीतिमा अन्यथा अर्थ लाग्ने गरी विशेष दूतहरू खटाउने, प्रधानमन्त्रीको भारत भ्रमणका अवसरमा कतिपय मर्यादा–असङ्गत भेटघाट तथा अभिव्यक्ति दिने जस्ता बिषय र भ्रमणको सन्दर्भमा जारी संयुक्त वक्तव्यका कतिपय प्रावधानहरूले नेपालको उपरोक्त नीति र परम्परामाथि आँच पुर्याएको विश्लेषण बैठकले गरेको छ,' विज्ञप्तिमा उल्लेख छ।
संविधान संशोधन नेपालको आन्तरिक मामिला भएको भन्दै संयुक्त वक्तव्यमा यो विषय समावेश गरी अनावश्यक बाह्य चासो निम्त्याइएको आरोप एमालेको छ। सबै अन्तर्राष्ट्रिय सङ्घ–संस्था एवम् मञ्चहरूमा भारतसँग निकट समन्वय गर्ने एवं प्रमुख अन्तर्राष्ट्रिय मामलाहरूमा भारतसँग समान धारणा राख्ने भन्ने प्रावधान उल्लेख गरेर नेपालको स्वतन्त्र विदेश नीतिलाई सीमित पराश्रित गराइएको विषयमा एमालेकोअसहमति रहेको जनाइएको छ।
साथै, दुई पक्षीय सहयोग परियोजनाको अनुगमनका लागि नेपाल सरकार र भारतीय दूतावासका उच्च अधिकारी सम्मिलित संयुक्त संयन्त्र बनाउने कुरा पनि मर्यादा सुहाउँदो नभएको बैठकको निष्कर्ष छ। इन्धन आपूर्तिका लागि भारतसँग पाइप लाइनसम्बन्धी सम्झौताका कुनै पनि प्रावधानले नेपालको स्वतन्त्र व्यापारको अधिकार र व्यापार विविधीकरणलाई नियन्त्रित गर्दै एकपक्षीय निर्भरतामा सीमित नगर्न पनि बैठकलेसरकारको ध्यानाकर्षण गराएको छ।
मंगलबार बिहान काठमाडौंका दुईवटा स्कुलमा भएको बम विस्फोट र अन्य विभिन्नस्कुलमा विस्फोट गराउने हिसाबले विस्फोटक पदार्थ राखिएको घटनाको भर्त्सना गर्दैसंलग्नहरूलाई अविलम्ब कानुनको दायरामा ल्याउन माग पनि गरेको छ।
एमाले केन्द्रीय कमिटीको बैठक बुधबार सुरु हुँदैछ ।
