व्यवस्थापिका संसदको बैठक छाडेर सांसदहरू राष्ट्रिय तथा अन्तर्राष्ट्रिय गैरसरकारी संस्थाको गोष्ठीमा जाने क्रम नरोकिएपछि सभामुख ओनसरी घर्तीमगर सांसदहरूप्रति आक्रोशित भएकी छन्।
एनजिओ/आइएनजिओको आयोजनामा हुने आवासीय कार्यक्रममा सहभागी हुने क्रमले प्राथमिकता पाउँदा संसदको बैठक प्रभावित भएको भन्दै सांसदहरुसँग सभामुख क्रुद्ध बनेकी हुन्।
बुधबारको संसद बैठकमा सरकारले पेश गरेको मधेसी आयोग गठन सम्बन्धी विधेयक विचार गरियोस् भन्ने प्रस्तावमाथिको मतदान प्रक्रिया कोरम नपुगेर स्थगित भएको छ।
बुधबारको बैठकमा १४९ जना संसद पनि उपस्थित नभएपछि सभामुख ओनसरी घर्तिमगरले सदनको कारबाही आधा घण्टाको लागि स्थगित गरेकी थिइन्।
बैठक स्थगित गरी आफ्नो कार्यकक्षमा पुगेर सांसदहरुको अनुपस्थितिबारे सोधखोज गर्ने क्रममा सभामुखलाई थाहा भयो कि संसदको वातावरण संरक्षण समितिका सदस्यहरु संयुक्त राष्ट्रसंघीय विकास कार्यक्रम यूएनडिपीको आयोजनामा नगरकोटस्थित एक होटलमा आवासीय कार्यक्रममा सहभागी हुन गएका रहेछन्।
त्यही समयमा अन्तर्राष्ट्रिय सम्बन्ध तथा श्रम समितिले सार्कस्तरीय कार्यक्रमका लागि आफ्ना सदस्यहरुलाई राजधानीस्थित सोल्टी होटलमा भेला गराइरहेको थियो।
संसद सचिवालयले राखेको सांसदहरुको उपस्थिति पुस्तिकामा करिब साढे चारसय सदस्यले हस्ताक्षर गरे पनि विधेयक पारित गर्ने क्रममा उपस्थित सदस्य १२६ भन्दा बढी नदेखिएपछि सभामुख घर्तिमगर सत्तारुढ दलका नेता र प्रमुख सचेतकसँग पनि असन्तुष्ट बनिन्।
त्यसपछि उनले संसद बाहिर रहेका समितिका पदाधिकारी तथा कर्मचारीलाई फोनमार्फत झोक्किदै भनिन, ‘दसैं र चाडबाडको मुखमा सदनबाट महत्वपूर्ण विधेयक पारित गर्न छाडी तपाईँहरू एनजिओको भात महत्वपूर्ण भएर गएको हो?’
समिति सभापतिकै निर्देशनमा सचिवालय सदस्य र समिति सदस्यसहित नगरकोट पुगेका वातावरण संरक्षण समितिका पदाधिकारीलाई चेतावनीपूर्ण शैलीमा सभामुखले भनिन्,‘भोलिको संसद बैठकमा पनि कोरम नपुगेर विधेयक पारित हुन सकेन भने त्यसको जिम्मेवार तपाईँहरू हुनुहुने छ।’
उनले उक्त समितिका सभापति र सदस्यलाई तत्काल कार्यक्रम छाडि राजधानी फर्कन कडा निर्देशन पनि दिइन्।
त्यस लगत्तै सभामुखलाई जानकारी भयो कि संसदकै अर्को विकास समितिले पनि यूएनडिपीकै आयोजनामा बिहिबार पार्क भिलेज रिसोर्टमा आवासीय कार्यक्रम गरेको छ। त्यसपछि उनले उक्त समितिका सम्बन्धीत कर्मचारीलाई पनि कार्यक्रम स्थगित गर्न निर्देशन दिइन्।
विभिन्न विषयमा क्रियाशिल हुँदै देशभित्र र बाहिर सबैभन्दा बढी भ्रमण र कार्यक्रम गर्दै आएको विकास समितिले सभामुख घर्तिमगरको कडा निर्देशन आएपछि बुधबार साँझमात्रै बिहिबारको कार्यक्रम स्थगित गरेको समितिका एक सदस्यले बताए।
केही दिनअघि संसदको बैठक चलिरहेकै समयमा एनडिआइको आयोजनामा पार्कभिलेज रिसोर्टमा आयोजित कार्यक्रममा सहभागी हुन संसद भवन परिसरबाटै गाडी चढेर महिला सांसदहरू गएपछि त्यो दिनको संसद बैठक पनि अबरुद्ध भएको थियो।
त्यसका अतिरिक्त संसदका दुईवटा समितिले संसद छाडी होटलको कार्यक्रममा गएको थाहा भएपछि समितिका पदाधिकारीलाई फोन गरी तत्काल सदनको बैठकमा उपस्थित हुन निर्देशन दिएकी थिइन्।
पटक पटक संसदको बैठक चलेको समयमा संसदीय समितिको बैठक वा राजधानी बाहिरका भ्रमण कार्यक्रम नगर्न सांसद र संसदीय समिति सभापतिहरुलाई निर्देशन दिए पनि समिति र सदस्यहरुले अटेर गरेपछि सभामुख उनीहरुसँग रुष्ट भएकी हुन्।
सरकारले सदनमा पेश गरेका महत्वपूर्ण विधेयकहरु पारित गर्न सदस्यको उपस्थिति गराउने जिम्मेवारी सत्तारुढ दलकै भए पनि सभामुख घर्तिमगरले प्रमुख सचेतकहरुलाई आधा घण्टाभित्र बाहिर रहेका सदस्यहरुलाई संसदमा उपस्थित हुन निर्देशन दिएकी थिइन्।
