नयाँ शक्तिका नेपालका संयोजक डा. बाबुराम भट्टराईले नेपाल र भारतबीच सम्पन्न २५ बुँदे सहमति अन्तर्गत परराष्ट्र नीतिका सम्बन्धमा भएको सहमतिले नेपाल भुटानीकरणको मार्गमा गएको बताएका छन्।
पार्टी नेता-कार्यकर्ता प्रशिक्षणका लागि बिहीबार बबरमहलस्थित पार्टी कार्यालयमा आयोजित कार्यक्रममा बोल्दै भट्टराईले उक्त कुरा बताएका हुन्। ‘स्वतन्त्र राष्ट्रले आफ्नो हित हेरेर विदेश नीति चलाउने हो,’ उनको भनाइ उदृत गर्दै पार्टी नेता देवेन्द्र पौडेलले भने, ‘तर, उस्तै विदेश नीति बनाउने भनेर औपचारिक समझदारी र प्रतिवद्धता व्यक्त गर्नुको अर्थ नेपाललाई भुटानीकरणतर्फ धकेल्नु हो।’
प्रधानमन्त्री पुष्पकमल दाहालको भर्खरै सम्पन्न भारत भ्रमणका क्रममा जारी संयुक्त विज्ञप्तिमा नेपाल र भारतबीच अन्तर्राष्ट्रिय विषयमा समान विदेश नीति बनाउने भन्ने विषय समावेश भएको थियो।
पौडेलका अनुसार कतिपय मुद्दामा नेपालको अन्तर्राष्ट्रिय अडान भारतसँग वा अन्य कुनै देशसँग पनि मिल्न सक्छ, तर एउटै विदेश नीति बनाउनु वा बनाउने प्रतिवद्धता व्यक्त गर्नुले देशका निम्ति अन्तर्घात भएको भट्टराईले बताएका थिए।
‘नेपालले विदेश नीति आफ्नै स्वार्थ हेरेर बनाउने हो,’ भट्टराईलाई उदृत गर्दै पौडेलले भने।
त्यसैगरी, आयोजना कार्वान्वयन गर्ने सवालमा नेपाल सरकार र दूतावासका कर्मचारीले संयुक्त अनुगमन गर्ने भन्ने कुरा पनि राष्ट्रिय स्वाभिमानविरुद्ध भएको उनले धारणा राखेको पौडेलले बताए। दुबै देशका समान हैसियतका कर्मचारीले काम गर्नुपर्नेमा विज्ञप्तिमा ‘नेपाल सरकार र दूतावास कर्मचारी’ उल्लेख भएकोमा भट्टराईको आपत्ति रहेको थियो।
नेपालको संविधान संशोधन विषय पनि संयुक्त विज्ञप्तिमा परेको कुरामाथि भने भट्टराईले कुनै धारणा राखेनन्।
