नेकपा माओवादी केन्द्रले व्यवस्थापिका संसदमा दर्ता भएको अख्तियार प्रमुख लोकमानसिंह कार्की विरुद्धको महाअभियोग प्रस्तावको पक्षमा रहन सांसदहरुलाई व्हीप जारी गरेको छ ।
आइतबार संसद भवन नयाँ बानेश्वरमा बसेको संसदीय दलको बैठकमा प्रधानमन्त्री तथा माओवादी केन्द्रका अध्यक्ष पुष्पकमल दाहालले सांसदहरुलाई निर्देशन दिदै महाअभियोग प्रस्तावको पक्षमा रहन निर्देशन दिएका हुन्। सांसद अग्नि सापकोटाले प्रधानमन्त्री दाहालले बैधानिक रुपमा व्यवस्थापिका संसदमा दर्ता भएको महाअभियोग प्रस्तावलाई अघि बढाउन बैठकमा निर्देशन दिएको जानकारी दिए।
पार्टी केन्द्रीय कार्यालयले दिएको अधिकार अनुसार नै अध्यक्ष दाहालले अन्य दलसँग छलफल गरेर प्रस्तावअघि बढाउन आफ्ना सांसदलाई निर्देशन दिएको पनि सांसद सापकोटाले जानकारी दिए।
आईतबार व्यवस्थापिका संसद बैठक सुरु हुनु अघि नै संसदीय दलको बैठक गरेर माओवादी केन्द्रले व्हीप जारी गरेको हो ।