अख्तियार प्रमुख लोकमानसिंह कार्की विरुद्धको महाअभियोग प्रस्ताव पारित गर्न माग गर्दै विभिन्न विद्यार्थी संगठनहरूले आइतबार संयुक्त जुलुस गरेका छन्।
माइतीघर मण्डलाबाट सुरु भएको जुलुस नयाँ बानेश्वरको संसद भवनअगाडि कोण सभा भएको थियो।
कोणसभालाई एमाले अनेरास्वियुकी अध्यक्ष नविना लामा, नेविसंघका महामन्त्री कुन्दनराज काफ्ले, माओवादी केन्द्र निकटको अखिल क्रान्तिकारीका अध्यक्ष नरेन्द्र न्यौपाने, विजय गच्छादार नेतृत्वको मधेशी जनाधिकार फोरम(लोकतान्त्रिक) निकटको मधेशी विद्यार्थी फोरमका अध्यक्ष कपिलेश्वर यादव लगायतका नेताहरूले सम्बोधन गरे।
उनीहरूले कार्की विरुद्धको महाअभियोग पारित गर्न माग गरेका थिए।
संयुक्त विद्यार्थी आन्दोलनले महाअभियोग पारित गर्न दवाब दिने उद्देश्यले निरन्तर अभियान चलाइरहेका छन्।
महाअभियोग प्रस्ताव पारित गर्न माग गर्दै उनीहरूले एमाले अध्यक्ष केपी शर्मा ओली र नेपाली कांग्रेसका सभापति शेरबहादुर देउवालाई ज्ञापनपत्र बुझाइसकेका छन्।
भोलि प्रधानमन्त्री एवम् माओवादी केन्द्रका अध्यक्ष पुष्पकमल दाहाललाई ज्ञापन पत्र बुझाउने कार्यक्रम रहेको अनेरास्वियुका सचिव आरसी लामिछानेले जानकारी दिए।
