ब्राजिलका स्टार स्ट्राइकर नेइमारका बुवाले आफ्नो छोरा स्पेनिस च्याम्पिन क्लब बार्सिलोनाबाट खेल्नुको रहस्य पाँच पटकको बालोन डि’ओर विजेता लिओनल मेसी रहेको बताएका छन्। सन् २०१३ मा क्याम्प नोउमा स्थानान्तरण भएपछि नेइमारले धारिलो सहयोगीको रुपमा मेसीसँग भूमिका निर्वाह गरिरहेका छन्, जसका कारण बार्साले सन् २०१४–१५ को बीचमा दुई ला लिगा र च्याम्पियन्स ट्रफीको उपाधि जितिसकेको छ।
नेइमारका पिताले आफ्नो छोरा विश्वकै उत्कृष्ट खेलाडी मेसीसँग खेलिरहेको र उनले आफ्नो २४ वर्षे छोरालाई राम्रो खेल्न उत्प्रेरणा दिइरहेको बताएका छन्। ‘हामी सबैलाई थाहा छ, मेसी को हुन र उनको महत्व के छ।
उनी मेरो छोराका ‘आइडल’ हुन् र उनको टोलीमा खेल्नु उसको लागि सुखद पक्ष हो,’ नेइमारका पिताले कोप पत्रिकालाई बताए। मेसीसँग खेल्न पाउँदा नेइमार निकै दंग परेको र यसैकारण छोरा बार्सिलोनामा बसेको उनले बताए।
‘मेसी र क्रिस्टियानो रोनाल्डो नजन्मिएको भए नेइमारजस्तो खेलाडी नजन्मिन सक्थ्यो। पेले र म्याराडोनाको प्रभावले गर्दा अन्य थुप्रै खेलाडी जन्मिए जस्तो,’ उनले भने– ‘मेसी बालोन डि’ओरका लागि योग्य छन्।’ नेइमारलाई बार्सिलोनाले मेसीकै बराबरी तलब दिएर सन् २०२१ सम्मका लागि अनुबन्ध गरेको थियो। नेइमार पनि हालको बालोन डि’ओरको सूचीमा छन्।
यसपालि बालोन डि’ओरको विजेताको रुपमा रोनाल्डोको सम्भावना बलियो छ। एनले २०१६ मा रियल म्याड्रिडलाई च्याम्पियन्स लिग र पोर्चुगललाई आफ्नो कप्तानीमा युरो कप जिताउन महत्वपूर्ण योगदान गरेका थिए।