भारतीय राष्ट्रपति प्रणव मुखर्जीको जनकपुर भ्रमणलाई लिएर भइरहेको तयारीबारे उपप्रधानमन्त्री तथा गृहमन्त्री विमलेन्द्र निधिसहितको उच्च सुरक्षा निकायको टोलीले शनिबार स्थलगत अनुगमन गरेका छन्।
टोलीमा उपप्रधानमन्त्री तथा गृहमन्त्री निधिसहित स्थानीय विकास मन्त्री हितराज पाण्डे, मुख्यसचिव सोमलाल सुवेदी, नेपाली सेनाका रथी बलदेवराज महत, सशस्त्र प्रहरीका प्रमुख दुर्जकुमार राई, नेपाल प्रहरीका प्रमुख उपेन्द्रकान्त अर्याल, गृहमन्त्रालयका सचिव, भारतीय दूतावासका प्रतिनिधिहरुको सहभागिता थियो।
भारतीय राष्ट्रपति मुखर्जी यही कात्तिक १८ गते जनकपुरको जानकी मन्दिर जाने कार्यक्रम छ। उहाँ जनकपुरमा आयोजना गरिने नागरिक अभिनन्दन कार्यक्रममा सहभागी हुने कार्यक्रम छ। राष्ट्रपति मुखर्जीको स्वागतका लागि जनकपुरमा भव्य तयारी गरिएको छ। उपप्रधानमन्त्री तथा गृहमन्त्री निधिको टोलीले शनिबार नै पोखराको पनि निरीक्षण गरेको छ।