तारुकाघाटबाट जोरचौतारा जाँदै गरेको बा ३ ख २००० नं को यात्रु बस आज तारुका–१ मा दुर्घटना हुँदा एक जनाको घटनास्थलमै मृत्यु भएको छ।
दुर्घटनामा परी तारुका–५ की विमला सार्कीको मृत्यु भएको जिल्ला प्रहरी कार्यालय, नुवाकोटले जनाएको छ। दुर्घटनामा परी एक जना गम्भीर घाइते भएका छन्। अन्य यात्रुको अवस्था सामान्य रहेको प्रहरीले जनाएको छ।
उकालोमा जाँदै गरेको बस ब्रेक नलागेर पछाडि हट्न थालेपछि विमला ढोकाबाट हम्फालेर बाहिर निस्किएको र सोही बसले चेप्दा उनको घटनास्थलमै मृत्यु भएको प्रत्यक्षदर्शी पत्रकार विष्णु तारुकेले बताए। बस र चालकलाई प्रहरीले नियन्त्रणमा लिएको छ। रासस