नेकपा एमालेका उपाध्यक्ष भीम रावलले सरकारले संविधान संशोधन गर्नुको औचित्य पुष्टि गर्नुपर्ने बताएका छन्।
सोमबार नेपाल संवत ११३७ को अवसरमा भक्तपुरको ठिमिमा भएको कार्यक्रममा उपाध्यक्ष रावलले संविधान संशोधनको औचित्य प्रष्ट पार्नुपर्ने बताए। प्रधानमन्त्री पुष्पकमल दाहालले संविधान संसोधनमा नेकपा एमाले पनि सहमति नजिक आएको र उसंगको सम्पुर्ण तिक्तता हटेको बताएकै भोलिपल्ट उपाध्यक्ष रावलको यस्तो भनाई सार्वजनिक भएको हो।
उनले संविधान संशोधन प्रक्रिया अघि लैजानु अगावै संविधानको कुन धारा वा प्रावधानले कुन, जाती, वर्ग, क्षेत्र, लिंग र समुदायको अधिकार कुण्ठित गरेको हो भन्ने जवाफ सरकारले दिनुपर्ने बताए। उनले संविधान संशोधन जस्तो संवेदनशील विषय औचित्व र अस्तित्वका आधारमा मात्र हुने बताए।
उपाध्यक्ष रावलले छिमेकी राष्ट्र प्रमुख आउँदा र आउने परिकल्पना मै सार्वजनिक विदा दिनु कुटनीतिक मर्यादा विपरीत भएको टिप्पणी गरे। उनले छिमेकीहरु आउँदा सम्मान गर्नु सामान्य भएपनि सार्वजनिक बिदा नै दिनु राष्ट्रिय स्वाभिमान विपरीत भएको बताए।
कार्यक्रमा नेकपा क्रान्तिकारी माओवादीका वरिष्ठ नेता सिपी गजुरेलले पाँच महिनासम्म नाकाबन्दी लगाएको भारतका राष्ट्रप्रमुख आउँदा सार्वजनिक बिदा दिनु गलत भएको तर्क गरे। उनले कुन आदर्श र मान्यताले प्रेरित भएर सार्वजनिक बिदा दिएको भन्दै प्रश्न गरे।
उनले जनताको मुक्तिको लागि परिवर्तनको पक्षमा काम गरेका शंखधर शाख्वाको आदर्शलाई व्यवहारमा उतार्नुपर्ने बताए।
