जर्मनी स्ट्राइकर मेसुट ओजिलले खेल सकिन तीन मिनेटअघि गरेको गोलका कारण इङ्लिस क्लब आर्सनल च्याम्पियन्स लिगको अन्तिम १६ मा प्रवेश गरेको छ।
खेल सुरु भएको १५ मिनेट भित्रै दुई गोलले पछि परेको भ्रमणकारी इङ्लिस क्लबले त्यो नतिजा उल्ट्याउदै तीन गोल थपेको थियो। आफ्नो घरेलु मैदानमा ६–० ले हराएको बुल्गेरियन क्लब लुडो राजगार्डविरूद्ध जीत निकाल्न गनर्सलाई कडा संघर्ष गर्नु परेको थियो, जब बार्बोसाले १२ र क्लाउडिउ केसेरुले १५ मिनेटभित्रै दुई गोल थपे।
खेलको २० मिनेटमा ओजिलको पासमा ग्रान्ट जाकाले १५ यार्डबाट गोल गरे। ४१ मिनेटमा आरोन राम्सेको क्रसमा ओलिभर गिराउडले टाउकोले गोल गरेपछि पहिलो हाफमा आर्सने वेङ्गरको टोलीले खेललाई २–२ को बराबरीमा ल्याएको थियो। ओजिलले ८७ मिनेटमा निर्णायक गोल गर्नुअघि आर्सनलका गोलरक्षक डेभिड ओस्पिनाले दुई वटा उत्कृष्ट बचाऊ गरेका थिए।
यो जीतसँगै समूह ‘ए’ मा आर्सनल र फ्रेन्च क्लब पेरिस सेन्ट जर्मनी (पिएसजी) अन्तिम १६ का लागि छनोट भएको छ। पिएसजीले पनि मंगलबार रातीको खेलमा बासेललाई २–१ गोलले पराजित गर्यो। दुवै क्लब समूह चरणको थप दुई खेल खेल्नुअघि नै अन्तिम १६ का लागि छनोट भएका हुन्। दुवै क्लबको समान १०–१० अंक छ। राजगार्ड र वासेलले १–१ अंक मात्र प्राप्त गरेका छन्।
पिएसजीको जीतमा ४३ मिनेटमा माटाउडी र मेउनेरले ९० मिनेटमा गोल गरेका थिए। वासेलको तर्फबाट ७६ मिनेटमा जुफीले एक गोल फर्काए। सेरे डाइले ८४ मिनेटमा दोहोरो पहेलोँ कार्ड पाएपछि वासेल अन्तिम ६ मिनेटको खेल १० खेलाडीमा सिमित थियो।
