भारतीय राष्ट्रपति प्रणव मुखर्जीको सवारीताका सर्वसाधारणलाई सडकमा हिँड्न निषेध नगरिएको प्रहरीले जनाएको छ। केही सञ्चारमाध्यममा सडकपेटीमा हिँड्न नदिने, पसलसमेत खोल्न नदिने भन्ने खालका समाचार आएको उल्लेख गर्दै नेपाल प्रहरीका प्रवक्ता डिअाइजी हेमन्त मल्लले पैदल हिँड्न र पसल खोल्न निषेध नगरिएको बताए। ‘हामीले पनि त्यस्तो हल्ला सुन्यौं, त्यसमा सत्यता छैन, प्रहरीले कसैलाई हिँड्न रोक लगाएको छैन’, प्रवक्ता मल्लले भने।
ट्राफिक प्रहरी प्रमुख डिआइजी प्रकाश अर्यालले पनि सर्वसाधारणलाई हिँड्न कुनै रोक नभएको बताए। ‘बरु प्रहरीले सडकको दायाँतिरबाट हिँडनुस् भनेको हो’, अर्यालले भने ‘हामीले सवारीलाई पनि रोक लगाएका छैनौं अर्को रूट प्रयोग गर्नुहोस् भनेका छौं।’
तीन दिने भ्रमणका लागि भारतीय राष्ट्रपति मुखर्जी बुधबार अपरान्ह १२ः३० नेपाल आउँदै छन्।
