भारतीय राष्ट्रपति प्रणव मुखर्जी पशुपतिनाथको मन्दिरमा दर्शन गर्न गएको बेलामा आगन्तुक पुस्तिकामा पशुपतिनाथ मन्दिर आसपासका घाटहरुको पुननिर्माण र नवनिर्माण गर्ने भारत सरकारले सहयोग गर्ने उल्लेख गरेका छन् । तर त्यो सहयोग कस्तो सहयोग हो त्यसका लागि कति रकम सहयोग गर्ने कुनै खुलाएको छैन।
यसअघि अनौपचारिक रूपमा भारतीय दूतावाससँग सामान्य छलफल भएपनि यस विषयमा पशुपति क्षेत्र विकास कोषका पदाधिकारी अन्यौलमा थिए। मुखर्जीले आगन्तुक पुस्तिकामा घाटको पुनर्निर्माणमा सघाउने उल्लेख गरेपछि मात्रै उनीहरुले भारतले सहयोग गर्न लागेको थाहा पाए। ‘यो कस्तो खालको सहयोग हो यथार्थ कुरा राष्ट्रपति फर्किएपछि भारतीय दूतावासले जानकारी गराउला,’ पशुपति क्षेत्र विकास कोषका सदस्य सचिव गोविन्द टण्डनले सेतोपाटीसँग भने,‘शनिबारबाट हामी आफैं पनि बुझ्छौं।’
एक महिना अघि नै दूतावासले मुखर्जीले पशुपतिनाथको दर्शन गर्ने इच्छा राखेको र पशुपति क्षेत्रमा सहयोग गर्न चाहेको जानकारी गराएको टण्डनले बताए।
पशुपति क्षेत्र विकास कोषले दूतावाससँग भूकम्पले क्षति पु¥याएका (पशुपति परिसरबाहेक) पशुपति क्षेत्रका सम्पदाको पुनर्निर्माण एवं सम्वद्र्धन, पशुपतिनाथ मन्दिरको पूर्वपट्टि मृगस्थली जंगलस्थित विश्वरुपा मन्दिरको पुनर्निमाण,आर्यघाट एवं घाट क्षेत्रको संरक्षण,सम्वद्र्धन र पशुपति क्षेत्र किास कोष अन्तर्गतको गोठाटारमा रहेको जग्गामा रहेको परिपुरक गुरुयोजनाको लागि सहयोग लगायतका ४ वटा योजनामा सहयोग गर्न सकिने प्रस्ताव राखेको थियो।
पशुपति क्षेत्र विकास कोषका प्रस्तावमध्ये आर्यघाट एवं घाट क्षेत्रको संरक्षण र सम्वद्र्धनमा सहयोग गर्ने प्रतिवद्धता मुखर्जीले गरेका छन्। आर्यघाट वरपरका १५ शिवालय ढल्किएका छन्। ती मन्दिरको संरक्षण तत्काल जरुरी रहेको टण्डनले बताए। मुखर्जीले घोषणा गरेको सहयोगले सूर्यघाट र आर्यघाटमा रहेका घाटहरुको पुनर्निर्माण र संरक्षण गरिने टण्डनले बताए। आर्यघाट वरपरका मन्दिर र घाटको पुनर्निर्माण र संरक्षणका लागि पचास करोड रुपैयाँसम्म लाग्ने अनुमान गरिएको उनले बताए।
‘कति रकम लाग्छ भन्ने कुराको टुंगो नभए पनि बढीमा पचास करोड रुपैयाँको हाराहारीमा काम सकिन्छ’, टण्डनले भने।
