गोर्खा भर्ती केन्द्रको विरोध गर्दे प्रर्दशनमा उत्रेका नेत्रविक्रम चन्द विप्लवको पार्टी नेकपा माओवादीका कार्यकर्तालाई प्रहरीले नियन्त्रणमा लिएको छ ।
शुक्रबार बिहान राजधानीको शान्तिवाटिकामा विरोध प्रर्दशनमा उत्रेका दर्जन कार्यकर्तालाई प्रहरीले नियन्त्रणमा लिएको हो। प्रहरीले विप्लव माओवादी कार्यकर्ता अनिल शर्मा सहित १२ जनालाई नियन्त्रणमा लिएको हो। शान्तिवाटिकामा जम्मा भएर केही कार्यक्रम नगर्नुहोला भन्दै प्रहरीले माईकिङ गरिरहेका बेला नै विप्लव माओवादीका कार्यकर्ता जम्मा भएर नाराबाजी गर्न थालेका थिए। उनीहरुले नारावाजी गर्न थालेपछि प्रहरीले धरपकड गरी नियन्त्रणमा लिएको हो।
विप्लव माओवादी कार्यकर्ताले प्रहरी भ्यान भित्र पनि गोर्खा भर्ती विरुद्ध नाराबाजी गरिरहेका थिए। उनीहरुले शान्तिबाटीकाबाट नाराबाजी सहित लैनचौर पुगेर भारतीय दुतावासमा ज्ञापनपत्र बुझाउने कार्यक्रम तय गरेका थिए । नेपाली नागरीक भारतीय भूमीको रक्षाको लागि लड्नु र मृत्यूवरण गर्दा पनि कुनै किसिमको क्षतिपुर्ति पनि नदिनु जस्ता अमानवीय र भेदभावपूर्ण व्यवहार भएको भन्दै विरोध हुँदै आएको छ।