स्वास्थ्य मन्त्री गगनकुमार थापाले दश प्रतिशत बिरामीलाई छुट नदिने निजी अस्पताललाई कारवाही गरिने चेतावनी दिएका छन्। लुम्बिनी अञ्चल अस्पताल बुटवलमा सञ्चालित नवजात शिशु सघन उपचार कक्षको शुक्रबार उद्घाटन गर्दै मन्त्री थापाले स्वास्थ्य सेवा पाउने नागरिकको अधिकार सुनिश्चित हुनुपर्ने बताए। सरकारले सबै हेल्थ पोष्टहरुमा चिकित्सक पठाउने तयारी गरिरहेको बताए।
नागरिकलाई गुणस्तरीय स्वास्थ्य सेवा दिनुपर्ने र त्यसका लागि सरकारी अस्पतालहरुलाई बलियो बनाउनुपर्ने उनको भनाइ छ। सरकारी अस्पतालबाट जनतालाई सबै स्वास्थ्य सेवा उपलब्ध गराउनु पर्ने उल्लेख गर्दै मन्त्री थापाले गुरु योजनाका साथ देशका सबै अञ्चल अस्पतालको स्तरवृद्वि गर्नुपर्ने बताए।
मन्त्री थापाले हरेक नेपाली नागरिकलाई स्वास्थ्य बीमा बनाउने काम अन्तिम चरणमा पुगेको बताएका छन् । स्वास्थ्य बीमालाई व्यवहारमा ल्याउन सरकारले प्राथमिकताका साथ काम गरिरहेको उनले बताए।
उनले जनतालाई केन्द्रमा राखेर स्वास्थ्य सेवा उपलब्ध गराउन आग्रह गर्दै मन्त्री थापाले बाल मृत्युदर घटाउन नवजात शिशु सघन उपचार कक्षले महत्वपूर्ण काम गर्ने बताए। लुम्बिनी अञ्चचल अस्पतालमा सञ्चालन भएको आठ वेडको नवजात शिशु सघन उपचार कक्षको विस्तार गरी बेड संख्या बढाउनुपर्ने र त्यसका लागि आफुले आवश्यक सहयोग गर्ने प्रतिवद्वता जनाए।
मन्त्री थापाले सरकारले नवजात शिशुहरुको निःशुल्क उपचार गर्ने व्यवस्था मिलाउने दावी गरे। मन्त्री थापाले लुम्बिनी अञ्चल अस्पताल विकास समितिलाई अस्पतालमा तत्काल फार्मेसी सञ्चालन गर्न निर्देशन दिए।
देशभरका अञ्चल अस्पतालको आफ्नै फार्मेसी हुनुपर्ने निर्णयलाई तत्काल कार्यान्वयनमा ल्याउन उनले निर्देशन दिदै अस्पताल सुधारको कामलाई महत्व दिन आग्रह गरे।
मन्त्री थापाले अस्पतालका लागि आवश्यक पर्ने दरवन्दी, उपकरण माग बमोजिम मन्त्रालयले उपलब्ध गराउने भन्दै सेवा दिने काममा कन्जुस्याई नगर्न आग्रह गरे।
उनले अञ्चल अस्पतालको ओपिडी सेवा समेत सांझ ५ बजेसम्म सञ्चालन गर्न निर्देशन दिए । दिउसो २ बजेसम्म अस्पतालकै ओपिडी र २ बजेपछि पेइङ क्लिनिक सञ्चालन गरेर सेवा दिन चिकित्सकलाई आग्रह गरे।
