बंगलादेशको राजधानी ढाकामा बगबन्धु कप र लगत्तै १२औं दक्षिण एसियाली खेलकुदको फुटबलतर्फ स्वर्ण जितेको नेपाल यस वर्ष तेस्रो उपाधिका लागि शनिबारबाट मलेसियाको कुचिङस्थित सारावाक नेगारी रंगशालामा एएफसी सोलिडारिटी कपमा पहिलोपल्ट भिड्दैछ।
जापानी प्रशिक्षक ग्योटोकी कोजीको अग्निपरीक्षाका रूपमा रहेको यो प्रतियोगितामा नेपाल आफ्नो पहिलो खेल प्रतियोगिताको कमजोर मानिएको टिमोर लेस्टेविरूद्ध खेल्दैछ। नेपालका लागि शनिबारको खेलमा राम्रो गोलअन्तरले टिमोरलाई पराजित गर्दै सेमिफाइनलमा प्रवेश गर्ने सुनौलो मौका छ। टिमोर आफ्नो पहिलो खेलमा ब्रुनाईसँग ४–० ले पराजित भइसकेको छ।
यसैकारण पनि शनिवार साँझ सवा ५ बजेबाट सुरु हुने खेलमा नेपालको विजयलाई अहिलेदेखि नै सुनिश्चित मानिएको छ। तर, दुई दिनअघि कुचिङमा ब्रुनई र टिमोरबीच खेल हुँदा वर्षाले प्रभावित बन्न पुगेको थियो। अहिले नेपालको सबैभन्दा ठूलो चिन्ता भनेको शनिबारको खेल पानीले प्रभावित नहोस् भन्ने नै छ। शुक्रबार कुचिङमा ठूलो हावा हुन्डरीसहित पानी परेको थियो।
टिमोर र नेपालबीच यसअघि दुईपल्ट भिडन्त भएको छ। दुवैपल्ट नेपालको पोल्टामा जीत हात लागेको छ। सन् २०१४ को विश्वकप छनोटअन्तर्गत टिमोरविरूद्ध भएको खेलमा नेपालले पहिलो लेगको खेल २–१ र दोस्रो लेग ५–० गोलअन्तरले जितेको थियो।
टिमोरले यस वर्ष खेलेको कुल १० खेलमा सबै खेल गुमाएको छ। फेरि टिममा अनुभवीभन्दा युवाहरूको जमघट ज्यादा भएकाले पनि नेपालको जीतप्रति नेपाली प्रशिक्षकहरू ढुक्क छन्। शनिबारको खेलमा टिमोरका स्टार स्ट्राइकर रुफिनो गामा अनुपस्थित रहने छन्। उनले ब्रुनाईविरूद्धको खेलमा रातो कार्डको सामना गर्नु परेको थियो।
नेपाल शनिबार ४–४–२ कै फर्मेसनमा मैदानमा उत्रिँदैछ। पहिलो खेलमा नेपालको अग्रपंक्तिको मोर्चा गोलमेसिनको छवि बनाएका नवयुग श्रेष्ठ र बिमल घर्तीमगरले सम्हाल्ने सम्भावना बलियो छ। यी दुई खेलाडीसँगै अनुभवी खेलाडीका रूपमा रहेका कप्तान अनिल गुरुङ, विराज महर्जन, रबिन श्रेष्ठ र किरन चेम्जोङको फिटनेसका कारण जापानी प्रशिक्षक कोजी निकै उत्साही छन्। उनले प्रतियोगिता सुरु हुनुअघि नै आफूले टिमोरलाई कमजोर टोलीका रूपमा नलिने बताइसकेका छन्। यसको अर्थ नेपालले पहिलो खेलमा जीतका लागि आफ्नो सबै शक्ति लगाउने पक्का छ।
अहिले नेपाली टोलीमा डिफेन्डर रञ्जित धिमाल र फरवार्ड रन्जन बिष्ट पूर्ण रूपमा स्वस्थ्य नरहेको बताइएको छ। धिमालले ह्यामस्टिङका कारण शुक्रबारको अभ्यास सत्रमा विश्राम लिएका थिए। बिष्ट ‘फ्लु’ बाट पीडित छन्। मिडफिल्डर विशाल राईलाई पनि सामान्य चोट लागेको छ। तर, उनी अभ्यासमा निरन्तर छन्। नाडीको सल्यक्रियापछि पुनः फुटबलमा फर्किएका अर्का स्ट्राइकर भरत खवास पनि नियमित अभ्यासमा छन्।
नेपाली टोली कुचिङकोे वातावरणसँग घुलमिल हुन ५ दिनअघि नै काठमाडौंबाट मलेसिया उडेको थियो। कोजीको प्रशिक्षणमा नेपालले एउटा मात्र मैत्रीपूर्ण खेल खेलेको छ। आठ महिनाअघि लाओसविरूद्ध भएको खेलमा नेपाल १–१ को बराबरीमा रोकिएको थियो। कोजीले आठ महिनापछि आफ्नो प्रशिक्षणमा नेपालले ठूलो प्रतियोगिता खेल्न लागेको हुनाले कुनै जोखिम नउठाउने बताइसकेका छन्। उनको अहिलेको मुख्य चासो भनेको शनिवार कुचिङको मौसम कस्तो हुन्छ भन्ने नै हो।
कोजीको सहायकका रुपमा रहेका नेपालका पूर्व कप्तान राजु शाक्य भन्छन्– ‘प्रतिद्धन्द्धीको विषयमा हामी जानकार छौं। हाम्रो उद्देश्य उपाधि जित्ने हो। त्यसैले हामी केटाहरूलाई उनीहरूको क्षमता अनुसार खेल्न प्रेरित गरिरहेका छौं।
नेपालले समूह ‘ए’ मा दोस्रो खेल मंगलबार ब्रुनईविरूद्ध खेल्ने छ। यो समूहमा पाकिस्तान र बंगलादेशले अन्तिममा आफ्नो नाम फिर्ता लिएपछि तीन टोली मात्र छ। त्यसैले शनिवार नेपालले टिमोरलाई हराएको खण्डमा मात्र पनि सेमीफाइनलको यात्रा तय गर्नेछ। यो समूहमा ब्रुनई पहिलो खेल जितेर सेमीफाइनल प्रवेश गरिसकेको छ। फिफा वरियतामा टिमोर नेपालभन्दा दुई अंकले माथि छ। अहिले नेपालको फिफा वरियता १ सय ८८ र टिमोरको १ सय ८६ छ।