कानून, न्याय तथा संसदीय मामिलामन्त्री अजयशंकर नायकले सरकारले अंगीकृत नागरिकता लिएकालाई राष्ट्रपति वा प्रधानमन्त्री बनाउने गरी संविधान संशोधनको प्रस्ताव ल्याउन लागेको भनेर गलत प्रचार गरिएको बताएका छन्।
सोमबार रिपोर्टस क्वलमा भएको कार्यक्रममा मन्त्री नायकले सरकारले संविधानको व्यवस्था विपरीत अंगीकृत नागरिकता लिएकालाई राष्ट्रपति वा प्रधानमन्त्री बनाउने गरी संविधान संसोधनको तयारी गरेको भन्ने हल्ला मात्र भएको दावी गरे। उनँले अन्तरिम संविधानको नागरिकता सम्बन्धी प्रावधान अनुसार नै छलफल गर्नुपर्छ भन्ने मधेसी मोर्चाको माग अनुसार सरकारले छलफल गरेको स्पष्ट पारे।
मन्त्री नायकले दलहरुबीच प्रदेशको सिमांकन, नागरिकता, भाषा र राष्ट्रिय सभाको प्रतिनिधित्व लगायत विषयमा दलहरुबीच सहमति गराएर मात्र संविधान संसोधन दर्ता गराउने बताए। विवादित विषयमा साझा सहमति खोज्दै निर्वाचन मुखी वातावरण निर्माणका लागि सरकारले दलहरुसँग छलफल जारी राखेको पनि उहाले स्पष्ट पारे। मन्त्री नायकले सिमांकनको विवाद सम्बोधनका लागि विभिन्न विकल्पमा छलफल चलिरहेको बताए।
