सरकारले पश्चिम नेपालका थारू समुदायमा जनस्वास्थ्य समस्याको रुपमा देखिएको सिकलसेल एनिमिया रोगको उपचारका निःशुल्क हुने ब्यवस्था गरे पनि बिरामीहरू रगत परीक्षण गर्दा लाग्ने शुल्कदेखि औषधिसमेत आफैं किन्न बाध्य छन्।
सिकलसेल एनिमिया भए नभएको यकिन गर्न बिरामीको रगतको हिमोग्लोबिन इलेक्ट्रोफोसिस जाँचका लागि स्वास्थ्य मन्त्रालयलले भेरी अंचल अस्पताललाई उपलब्ध गराएको एचपीएलसी मेसिन सञ्चालन नभई थन्किदा बिरामी समस्यामा परेका हुन्।
भेरी अञ्चल अस्पतालमा सिकलसेलका बिरामीहरु दैनिक ३ देखि ५ जना आउने गरे पनि अस्पताल ब्यवस्थापनको लापरबाहीले रगत परीक्षण गर्ने मेसिन अझै सञ्चालन भएको छैन।
मेसिन सप्लाई गर्ने कम्पनीको इन्जिनियर नआउँदा मेसिन जडान र सञ्चालन हुन नसकेको खस्पतालले दाबी गरेको छ।
स्वास्थ्य मन्त्रालयले करिब २९ लाख पर्ने मेसिन उपलब्ध गराएको एक महिना भन्दा बढी भए मेसिन जडान नहुँदा अस्पतालको प्रयोगशालामा थन्किएको छ ।
अस्पतालमा आएको मेसिन जडान नहुँदा बिरामीहरु भने निजी क्षेत्रका प्रयोगशालामा चर्को शुल्क तिरेर रगत परीक्षण गराउन बाध्य छन्। सरकारले २०७२ साउन १ गते देखि सिकलसेलका बिरामीहरुलाई निःशुल्क स्बास्थ्य परीक्षण र औषधी उपलब्ध गराउने घोषणा गरेको थियो। यद्यपी भेरी अंचल अस्पताल ब्यवस्थापनको लापरबाहीले गत वर्ष मेसिन खरिदका लागि निकाशा भएको रकम फ्रिज भएको थियो। यो वर्ष मन्त्रालय आफैंले खरिद गरेर उपलब्ध गराएको रगतको हिमोग्लोबिन इलेक्ट्रोफोसिस जाँचका गर्ने मेसिन पनि एक महिनादेखि थन्किएको छ।
सरकारले सिकलसेल एनिमिया रोग लागेको पुष्टी भएका बिरामीहरुको स्वास्थ्य परीक्षण र औषधी उपचारमा १ लाख रुपैयासम्म आर्थिक सहयोग गर्दै आएको छ ।
सरकारले निःशुल्क उपचार सेवा उपलब्ध गराए पनि रोगले थलिएर अस्पतालमा आएका बिरामीहरुको रोग पत्ता लगाउनका लागि गरिने रगत परीक्षण नहुँदा बिरामीहरुले अझै पनि मंहगो शुल्क तिर्न बाध्य भएको सिकलसेलका बिरामी महादेब थारुले बताए। ‘सरकारले निःशुल्क भने पनि रगत परीक्षण गराउँदा बिरामीले आफैं पैसा तिर्नुपर्छ,’ उनले भने, ‘सिकलसेलका बिरामीले खाने मुख्य दुई वटा औषधी महंगोमा किनेर खानु परेको छ सरकारको निःशुल्क भन्ने कुरा त गफ मात्रै जस्तो छ।’
थारु समुदायको कुल जनसंख्याको करिब १० प्रतिशतमा सिकलसेल एनिमिया सम्बनधी समस्या देखिए पनि सहज रुपमा उपचार सेवा संचालन नहुँदा हाल सम्म नेपालगन्जको भेरी अंचल अस्पतालबाट २ सय ४४ जना सिकलसेल एनिमियाका बिरामीहरुले उपचार सेवा लिइरहेका छन्।