भारत भ्रमणमा रहेका नेपाली कांग्रेस सभापति एवम् पूर्वप्रधानमन्त्री शेरबहादुर देउवाले मंगलबार भारतीय प्रधानमन्त्री नरेन्द्र मोदीसँग भेट गरेका छन्।
मोदीको प्रधानमन्त्री कार्यालयमा मंगलबार बिहान १०:४५ बजे भएको भेटमा भूकम्पपछिको पुनर्निर्माण र संविधान कार्यान्वयनका विषयमा छलफल भएको सभापति देउवाले सेतोपाटीलाई जानकारी दिए।
छलफलबाट बाहिरिएपछि सेतोपाटीसँगको टेलिफोन सम्पर्कमा देउवाले भने,‘मोदीजीसँगको भेटमा भूकम्पले क्षति पुर्याएका संरचनाहरुलाई पुनर्निर्माणमा भारत जुनसुकै सहयोग गर्न तयार रहेकोले छिटो गर्नु पर्यो भन्ने कुरा उहाँको रह्यो,’ उनले भने, ‘मैले पुनर्निर्माणका विषयमा भएको प्रगतिको बारेमा जानकारी गराएँ र भारतको सहयोग आवश्यक रहेको उल्लेख गरेँ।’
करिब ४० मिनेट लामो छलफलका क्रममा भारतीय प्रधानमन्त्री नरेन्द्र मोदीले नेपालको पुनर्निर्माणका लागि भारतले जस्तोसुकै सहयोग गर्न पनि तयार रहेको आश्वासन दिएको देउवाले बताए।
त्यसैगरी दुई नेताबीच संविधानको कार्यन्वयनको विषयमा पनि कुराकानी भएको थियो। देउवाका अनुसार आफूले जनजाति, मधेसी, थारूलगायतका संविधानप्रति असन्तुष्ट पक्षहरुलाई समेट्नका लागि भइरहेको प्रयासको बारेमा जानकारी गराएको र मोदीले असन्तुष्टहरुलाई समेटेमा संविधानको कार्यन्वयनमा सहजता हुने कुरा उल्लेख गरेका थिए।
‘सबै असन्तुष्टहरुलाई संविधानको कार्यन्वयनलगायतका सबै प्रकृयाहरुमा समेट्न सकेमा शान्ति, स्थायित्व र प्रगति सम्भव छ’ मोदीको भनाई उदृत गर्दै देउवाले भने, ‘नेपालको हरेक राजनीतिक स्थायीत्व र विकासमा भारतको सधै सहयोग हुनेछ। राजनीतिक स्थानयीत्वले मात्र दिगो विकास सम्भव हुन्छ।’
भेटका क्रममा मोदीले पुननिर्माण प्रक्रियामा भारतीय भूपु सैनिकलाई पनि सहभागी गराएर पुननिर्माण गर्न सके राम्रो हुने सुझाव दिएका छन्।
सोबार साझ भारतीय सुरक्षा परिषदका प्रमुखलाई भेटेका देउवाले आज साँझ कांग्रेस आइका नेता करण सिंहसँग भेट्ने कार्यक्रम रहेको छ।