अमेरिकाका नव-निर्वाचित राष्ट्रपति डोनाल्ड ट्रम्पले अमेरिकाको स्वार्थलाई पहिलो प्राथमिकतामा राखे पनि सबै राष्ट्रसँग उचित र निष्पक्ष व्यवहार गर्ने बताएका छन्।
भर्खरै गरेको आफ्नो विजयी भाषणका क्रममा ट्रम्पले उक्त कुरा बताएका हुन्। भाषणका क्रममा उनले कुनै चर्को कुरा बोलेनन् र उनी प्रतिद्वन्द्वी हिलारी क्लिन्टनप्रति पनि नरम रूपमा प्रस्तुत भए।
‘मलाई भर्खरै सेक्रेटरी क्लिन्टनले फोन गरिन् र हाम्रो जीतका लागि बधाई दिइन्।मैले पनि कठोर ढंगले प्रतिष्पर्धा गरिएको अहिलेको चुनावमा उनी र उनको परिवारलाई बधाई दिएँ,’ ट्रम्पले भने ‘उनले पराक्रमपूर्ण ढंगले चुनाव लडिन्। उनी लामो समयदेखि कठोर परिश्रम गर्दै आएकी छन्। उनले देशलाई गरेको सेवाप्रति हामी कृतज्ञ छौं। मैले यो कुरा गम्भीरतापूर्वक भन्दैछु।’
भाषणका क्रममा उनले प्रत्येक अमेरिकी नागरिकले आफ्ना सपना र सम्भावना पुरा गर्ने अवसर प्रदान गर्ने अवस्था आफूले सृजना गर्ने बताए।
‘हामीले भुलिसकेका यो देशका पुरुष र महिलालाई हामीले फेरि भुल्ने छैनौं। हाम्रा शहर र विकासका पूर्वाधार मर्मत गर्ने छौं,’ उनले भने ‘हामी संसारभरका सबै त्यस्ता देशसँग मिलेर अघि बढ्ने छौं जुन देश हामीसँग मिल्न चाहन्छन्।’
