भारत र चीनका लागि नेपाली राजदूतहरुले चीन र भारततर्फ व्यापार बिस्तार गर्न आफूहरुले सक्दो प्रयास गर्ने प्रतिबद्धता जनाएका छन्।
बिहीबार नेपाल चेम्बर अफ कमर्सले गरेको अन्तरक्रियामा भारतका लागि नेपाली राजदूत दीपकुमार उपाध्यायले भारतको लगानी भित्र्याएर उत्तर दक्षिण दुवै तर्फको व्यापार बिस्ताका लागि ठोष खाका आवश्यक रहेको बताए। उनले भारतीयहरुले ठूला उद्योग सञ्चालन गर्न आर्थिक हिसाबले नेपाल उपयुक्त ठानेकाले आवश्यक वातावरण बनाउन व्यवसायीहरुले पहल गर्नुपर्ने बताए। राजदूत उपाध्यायले भारतसँग हालै भएको विद्युत व्यापार संझौता र अन्तरदेशीय ट्रान्समिसन लाइन बिस्तारले पनि नेपालमा ठूला उद्योग सञ्चालनका लागि वातावरण सहज हुने बताए।
कार्यक्रममा चीनका लागि नेपाली राजदूत लीलामणी पौडेलले नेपाली व्यवसायीहरुले दीर्घकालीन व्यवसाय गर्न सके चिनियाँ लगानीकर्ता नेपालमा आउनसक्ने बताए। उनले व्यवसायीहरुले चीनसँग लाभ लिन तत्परता लिए आफूले समन्वय गर्ने प्रतिवद्धता जनाए। उनले चीनको महावाणिज्य दूत भएर यसअघि नै काम गर्दा चीनको लगानी नेपालमा भित्र्याउन धेरै संभावना रहेको आफूले पाएको बताए।
कार्यक्रममा व्यवसायीहरुले आर्थिक रुपमा सबल रहेका चीन र भारतको लगानी नेपालमा भित्र्याउन सके आर्थिक उन्नतिका लागि नयाँ बाटो खुल्ने धारणा राखेका थिए।
