नेपाली राष्ट्रिय टोलीका सबैभन्दा अनुभवी प्रशिक्षक भीम थापाले एएफसी सोलिडारिटी कपअन्तर्गत मंगलबार हुने फाइनलमा मकाउलाई पराजित गर्दै इतिहास रच्ने अवसर नजिक रहेको नेपाली टोलीलाई केही ‘टिप्स’ दिएका छन्। राष्ट्रिय खेलकुद परिषद्मा फुटबलको प्रमुख प्रशिक्षक रहिसकेका थापाले लामो समयपछि नेपाली स्ट्राइकरमा देखिएको गोल गर्ने क्षमताबाट आफू निकै प्रभावित भएको बताएका छन्।
सेतोपाटीसँग कुरा गर्दै उनले विगत केही समयदेखि राष्ट्रिय टोलीले उत्कृष्ट प्रदर्शन गर्दै आइरहेको र यस प्रतियोगितामा पनि नेपाली खेलाडीले उत्कृष्ट प्रदर्शन गरेको दावी गरेका छन्। उनले सवा ५ बजेदेखि सुरु हुने खेलमा नेपाली डिफेन्डर चुस्त हुनु पर्ने औंल्याएका छन्।
गोलरक्षक किरण चेम्जोङ र कप्तान विराज महर्जनबाट निकै आशा राखेका थापाले आपसी तालमेललाई कायम राख्न सुझाव दिएका छन्। ‘गोलकिपर किरणले आज विशेष ध्यान दिनु पर्नेछ। एक आपसमा संवाद गरेर खेल्दा आत्मविश्वास पनि बढेर जानेछ,’ अखिल नेपाल फुटबल संघ (एन्फा) को प्राविधिक निर्देशक बनेर लामो समय काम गरिसकेका थापाले भने।
उनले ८० को दशकमा नेपाली फुटबलमा देखिने अग्रपंक्तिको विशेषता अहिले नवयुग श्रेष्ठ, विमल घर्तीमगरका कारण परिपूर्ति हुँदै गएकोमा खुसी व्यक्त गरे। ‘नेपाली फुटबलका लागि यो सकारात्मक पक्ष हो। आज उनीहरूको पनि परिक्षा हुनेछ,’ उनले भने।
जापानी प्रशिक्षकको मेहनतबाट प्रभावित थापाले नेपाली टोलीको पहिले देखिको रोग भनेको कहिले काही चाहिने भन्दा बढी आत्मविश्वासी बन्ने रहेको बताए। र भने–‘यो रोगबाट आज बच्नु जरुरी छ।’ उनी मकाउका स्ट्राइकर नेपालीभन्दा केही अग्ला र स्कोरिङ क्षमता भएको देखिए पनि आत्तिहाल्नु पर्ने कारण नरहेको बताउँछन्।
‘नेपाली गोल पोस्टको जिम्मेवारी किरणको हातमा हुने हुँदा उनको निर्णय क्षमता महत्वपूर्ण हुन जान्छ,’ उनले भने। नेपाल र मकाउले यसअघि ५ वटा खेल खेलेका छन्। जसमा नेपालले ३ जीत, १ ड्र र १ खेल बराबरीमा राखेको छ।
(सेतोपाटीका नवीन अर्यालसँग गरेको कुराकानीमा आधारित)