भारतले पाँच सय र हजारको नोटमा लगाएको प्रतिबन्धको असर वीरगन्जमा भएको वैवाहिक कार्यक्रममा प्रत्यक्ष रुपमा देखिएको छ। भारु पुराना ठूला नोटमा लगाइएका कारण वीरगन्जमा सम्पन्न भएको वैवाहिक कार्यक्रमका सम्पूर्ण विधि चेकबाट नै भएको छ।
कार्यक्रममा सगुन तथा उपहार एवम् दक्षिणा समेत भारतबाट आएका बेहुली पक्षले बैंक चेकबाट नै दिएका छन्।
बुधबार दिउँसो स्थानीय होटल सुरजमा सम्पन्न भएको सो वैवाहिक समारोहमा भारत झारखण्डका बेहुली पक्षले बेहुलालाई सुगनको रकम २१ हजार रुपैयाँको चेक नै दिएका छन्।
बेहुली डाक्टर प्राची यादवसँग वीरगन्ज मनियारीका डाक्टर निरज यादवको भएको बिहेमा बेहुलीका बुबा डाक्टर सुरेन्द्र यादवले आफूसँग नगद रकम नभएका कारण ज्वाइँ निरजलाई चेक नै दिएको बताए।
पूजापाठ गराइदिएबापत पुरोहितलाई दक्षिणा पनि चेक नै दिनुपर्ने बाध्यता रहेको बेहुलीका बुबा सुरेन्द्रले बताए।
‘यो बिहे हाम्रो लागि अनौठो रहने छ,’ उनले भने। बेहुला–बेहुली चिकित्सक भए पनि बिहे दाइजो लेनदेनबिना नै भएको उनले बताए। ‘तर, दाइजो नदिँदा पनि अन्य विधि र खर्चका लागि रुपैयाँ चाहिन्छ नै, हामीसँग नगद छैन, त्यसैले चेकबाट नै सबै काम चलाउनु पर्ने बाध्यता आएको हो,’ उनले भने।
कार्यक्रममा सहभागी पर्साका प्रमुख जिल्ला अधिकारी केशवराज घिमिरेले भारु ठूला नोटमाथि लागेको प्रतिबन्धको असर दुबै देशबीच रहेको रोटीबेटीको सम्बन्धमा परेको धारणा व्यक्त गरे।
समारोहमा सहभागी भारतीय महावाणिज्य दूतावास वीरगन्जका कन्सुलर कृष्ण चैतन्यले भने, ‘भारतमा नोटमाथिको प्रतिबन्ध लागेको छ तर बेहुली पक्षसँग नगद नभए पनि वैवाहिक कार्यक्रम नरोकिनुले दुबै देशबीचको सम्बन्ध र घनिष्टतालाई प्रष्ट्याएको छ।’