२००९ सालदेखि लालपूर्जा बिना भूमि भोगचलन गर्दै आएका बुटवलका १ सय ३५ जनालाई बुधबार जग्गाधनी प्रमाणपूर्जा दिइएको छ। बुटवलको मुख्य राजमार्गमै लालपूर्जा बिना जग्गा भोगचलन गर्दै आएका जग्गाधनिले ६४ वर्षपछि भूमि भोगचलनको प्रमाणपूर्जा प्राप्त गरेका हुन्।
लामो समयदेखि आफूले भोगचलन गर्दै आएको जग्गाको प्रमाणपूर्जा माग गर्दै आएका जग्गाधनीले ६४ वर्षपछि लालपूर्जा पाउँदा खुसी व्यक्त गरेका थिए। बुधबार बुटवलस्थित मालपोत कार्यालयमा आयोजित कार्यक्रममा भूमिसुधार तथा व्यवस्था मन्त्री विक्रम पाण्डे र रुपन्देही क्षेत्र नम्बर ४ का सांसद् तथा पूर्वअर्थमन्त्री विष्णु पौडेलले संयुक्त रुपमा लालपूर्जा वितरण गरे।
बहाल विटौली र कोदाले जग्गाको प्रमाणपूर्जाको लागि निवेदन दिएका बुटवल उप–महानगरपालिकाका वडा नम्बर ६, ७ र ८ का ५ सय ५५ जनामध्ये पहिलो चरणमा १ सय ३५ जनालाई लालपूर्जा वितरण गरिएको हो। निवेदन दिएका बाँकी जग्गाधनीलाई पनि अनुगमन गरी जग्गाधनी पूर्जा वितरण गरिने मालपोत कार्यालयले जनाएको छ।
जग्गाधनीलाई प्रमाणपूर्जा वितरण गर्दै भूमिसुधार तथा व्यवस्था मन्त्री विक्रम पाण्डेले देशको सुकुमबासी समस्यालाई समाधान गर्नका लागि नया“ ऐन ल्याउने तयारी भएको बताए।
उनले वर्षौंदेखिको भूमिको समस्यालाई आफ्नै कार्यकालमा समाधान गर्ने गरी काम भइरहेको दाबी गरे। मन्त्री पाण्डेले अहिले जग्गा धनीपूर्जा नपाएकाहरूलाई छिटो लालपूर्जा वितरण गरिने बताए। पूर्वअर्थमन्त्री पौडेलले निर्वाचनको समयमा आफूले गरेको प्रतिबद्धता अनुसार जग्गा धनीपूर्जा नपाएकोलाई पूर्जा वितरण गरेको दाबी गरे।
बुटवल उपमहानगरपालिका र सैनामैना नगरपालिकाको बजार क्षेत्रमा बहाल विटौरी, कोदाले र आंकडा जग्गाको समस्या रहेको प्रमुख मालपोत अधिकृत यादवप्रसाद पाण्डेले जानकारी दिए।
बुटवल उप–महानगरपालिकामा बहाल विटौरी र कोदाले तथा सैनामैना नगरपालिकामा आँकडा जग्गाको समस्या रहेको पाण्डेले बताए। उनले बुटवल क्षेत्रमा लालपूर्जा वितरण सुरू भएसँगै सैनामैना नगरपालिकामा पनि निवेदन परेका ३ सय ८२ वटा आँकडा जग्गाको लालपूर्जा वितरणको प्रक्रिया सुरू गरिने जानकारी दिए।