सिन्धुपाल्चोक जिल्लाकै ठूलो मानिने गौराती भीमेश्वरको तीनदिने मेला बुधबार बेलुकादेखि सम्पन्न भएको छ ।
पूर्णिमाका दिनदेखि सुरु भएको सो मेला चौतारा नगरपालिका–७ स्थित रथलाई पुरानो बजार परिक्रमा गराएपछि सिन्दूरे जात्रासहित बेलुकादेखि सम्पन्न भएको हो । साबिक पिपलडाँडा–८ हाल चौतारा नपा–२ स्थित गौरातीडाँडामा अवस्थित भीमेश्वर मन्दिर सदरमुकामबाट चार किमी उत्तर पश्चिममा रहेको छ ।
पूर्णिमाको बिहानैदेखि लाग्ने सो मेला विशेषगरी रातभरि लाग्ने गर्दछ । पूर्णिमाको साँझ चौताराको गुठीघरबाट भीमसेनको मूर्तिलाई बाजागाजासहित रथमा लगेर भीमेश्वरको मूर्तिसँग पुनर्मिलन गराइने प्रचलन रहिआएको छ । भोलिपल्ट फर्काइएको रथलाई बजारमा बास राखी द्वादशीका दिन सिन्दूरे जात्रासहित गुठीघरमा थन्क्याइने प्रचलन छ ।
भूकम्पले चौतारा बजारका करिब ९० प्रतिशत घर ध्वस्त भएकाले घरघरमा चदुँवा टाँगी रथ अड्याएर पूजा गर्ने काम यस वर्ष भने सीमित हुन पुगेको गुठीका नायो टेकबहादुर श्रेष्ठले बताए ।
गत वर्षझैँ यस वर्ष पनि करिब ६० देखि ७० हजारको हाराहारीमा दर्शनार्थीको उपस्थिति रहेको स्थानीयवासी चन्द्रबहादुर तामाङले बताए । मेला अवधिभर मदिरा बेचबिखन निषेध गर्नुका साथै सुरक्षा व्यवस्था कडा पारिएकाले मेलामा कुनै अप्रिय घटना नभएको प्रहरी प्रवक्ता प्रहरी नायब उपरीक्षक श्यामकृष्ण अधिकारीले जानकारी दिए ।
विधिवत्रुपमा मेला सम्पन्न भएपनि प्रत्येक महिनाको पूर्णिमा र पञ्चमीमा विभिन्न गाउँबाट समूहगत रुपमा बाजागाजासहित पञ्चबलि लगिने प्रचलन रहेको र सो क्रम फागुन चैतसम्म रहने गरेको छ । पञ्चबलिमा राँगा, बोका, भेडा, हाँस र कुखुरासहित पाँचवटा पशुपन्छीको बलि चढाउने गरिएको स्थानीयवासीको कथन रहेको छ। रासस
